بیٹے کی فرمائش پرکار پر جھنڈا لگانا شہری کو مہنگا پڑگیا

کراچی میں ٹریفک قوانین کی خلاف ورزی کرنے والے شہریوں کے خلاف خصوصی مہم کے دوران میٹروپول چوک پر ٹریفک پولیس نے قومی پرچم اور فینسی نمبر پلیٹ لگانے پر شہری کا پانچ سو روپے کا چالان کر دیا۔

ٹریفک سیکشن کینٹ کے سیکشن آفیسر انسپکٹر محمد مہتاب کے مطابق شارع فیصل سے میٹرو پول کی طرف آنے والی پرائیویٹ کار نمبر بی ایم اے 490 پر منسٹر طرزکا جھنڈا لگا دیکھ کر انہوں نے گاڑی کو روکا، کار کی عقبی نمبر پلیٹ فینسی تھی جس پرگاڑی کا کا نمبر بہت چھوٹے الفاظ میں درج تھا جب کہ نمبر پلیٹ پر صرف اسٹائلش طرز کا ڈبلیو تحریر تھا۔

پولیس کے مطابق کارپر جھنڈا لگانے کی وجہ دریافت کی گئی تو کار ڈرائیور لشکر خان نے بتایا کہ انہوں نے اپنے بیٹے کی فرمائش پر ایسا کیا ہے جبکہ نمبرپلیٹ بھی ان کے بیٹے نے ہی ڈیزائن کروائی ہے۔ جس پر ٹریفک پولیس نے کار کو تحویل میں لے کرٹریفک چوکی پہنچایا جہاں کار کی نمبر پلیٹ اور جھنڈا اتار دیا گیا اس کے خلاف ورزی پر شہری کا پانچ سو روپے کا چالان کیا گیا ہے۔