رخصتی کے وقت روتے روتے دلہن دنیا ہی سے رخصت ہو گئی

بھارتی ریاست اوڈیشا میں رخصتی کے وقت مسلسل رونے سے دلہن کو دل کا دورہ پڑگیا جس کے نتیجے میں دلہن کی موت واقع ہوگئی۔

اہل خانہ کا کہنا ہے کہ دلہن روزی کے والد کا چند ماہ قبل ہی انتقال ہوا تھا اور وہ باپ کی اچانک موت کی وجہ سے شدید ذہنی دباؤ میں تھی اسی لیے شادی کے تمام انتظامات بھی ماموں نے کیے تھے۔

بھارتی میڈیا کے مطابق سونپور میں شادی کی تقریب میں اُس وقت صف ماتم بچھ گئی جب عین رخصتی کے وقت زیادہ رونے کی وجہ سے دلہن کی موت واقع ہوگئی۔ڈاکٹرزکا کہنا ہے کہ دلہن کی موت حرکت قلب بند ہونے کی وجہ سے ہوئی، روتے روتے دلہن کی ہچکی بندھ گئی تھی اورکبھی کبھی ایسا ہوتا ہے کہ اس کا اثر دل پر بھی پڑتا ہے۔

پولیس کا کہنا ہے کہ دلہن کی لاش کو پوسٹ مارٹم کے لیے بھیج دیا ہے، رپورٹ آنے کے بعد تفتیشی عمل کو آگے بڑھایا جائے گا۔