صحافیوں کو وقت پر تنخواہ-صحت انشورنس دینا ہوگی۔قانون نافذ

اسلام آباد ۔ صحافیوں کو وقت پر تنخواہ، لائف اینڈ ہیلتھ انشورنس میڈیا مالکان دینے کے پابند ہوں گے۔ صدر مملکت ڈاکٹر عارف علوی نے صحافیوں کے تحفظ اور آزادانہ صحافت کے فروغ کے حامل جرنلسٹس اینڈ میڈیا پروفیشنلز پروٹیکشن ایکٹ 2021 پر دستخط کردیے۔

ایکٹ پر دستخط کی تقریب ایوان صدر میں منعقد ہوئی، جس میں وفاقی وزیر اطلاعات و نشریات فواد چوہدری، وفاقی وزیر انسانی حقوق ڈاکٹر شیریں مزاری، وزیر مملکت اطلاعات و نشریات فرخ حبیب، وزیراعظم کے معاون خصوصی برائے سیاسی ابلاغ شہباز گل، صحافتی تنظیموں کے عہدیداران اور صحافیوں کی بڑی تعداد نے شرکت کی۔

خیال رہے کہ قومی اسمبلی نے 8 نومبر 2021 اور سینیٹ نے 19 نومبر 2021کو صحافیوں اور میڈیا پروفیشنلز کے تحفظ ایکٹ 2021 کی منظوری دی تھی، اس ایکٹ کے تحت صحافیوں اور میڈیا پروفیشنلز کو حق رازداری حاصل ہوگیا ہے، انہیں کسی بھی فرد یا ادارے کی جانب سے جبر، تشدد، خوف و ہراس، دھونس، دھمکی اور جبری گمشدگی کے خلاف تحفظ حاصل ہو گیا ہے ، انہیں خبر کا ذریعہ بتانے کے لیے مجبور نہیں کیا جاسکے گا۔

ایکٹ کے مطابق میڈیا مالکان صحافیوں اور میڈیا پروفیشنلز کو مقرر کردہ میعارات کے تحت لائف اینڈ ہیلتھ انشورنس فراہم کریں گے، میڈیا مالکان صحافیوں کو وقت پر تنخواہ دینےکے بھی پابند ہوں گے۔صحافیوں اور میڈیا پروفیشنلز کے تحفظ اور شکایات کی آزادانہ تفتیش اور فوری ازالےکے لیے آزادکمیشن بھی قائم کیا جائےگا،فواد چوہدری کے مطابق آزادکمیشن 14 دن میں صحافیوں کی شکایات پر فیصلہ سنائےگا۔