سری لنکا کے صدر فوجی طیارے میں ملک سے فرار

کولمبو:سری لنکا کے صدرگوٹابایا راجا پاکسے فوجی طیارے میں ملک سے فرار ہوکر مالدیپ پہنچ گئے۔

غیرملکی میڈیا کے مطابق سری لنکا کے صدر گوٹابایا راجا پاکسے ملک سے فرار ہوکر مالدیپ پہنچ گئے۔سری لنکن صدر فوجی طیارے میں مالدیپ پہنچے۔وزیراعظم رینل وکرما سنگھے کو قائم مقام صدر مقررکردیا گیا ہے ۔دوسری جانب کولمبو میں وزیراعظم ہاؤس کے باہرہزاروں مظاہرین نے احتجاج کیا۔ سیکورٹی فورسزنے مظاہرین کو منتشر کرنے کے لیے آنسو گیس استعمال کی۔ملک میں ایمرجنسی بھی نافذ کردی گئی ہے۔

سری لنکا میں بدترین معاشی بحران کے بعد حکمران اشرافیہ کے خلاف شدید احتجاج اورمظاہرے جاری ہیں۔ چند روز قبل ہزاروں مشتعل مظاہرین نے صدارتی محل پردھاوا بول دیا تھا جس کے بعد صدر گوٹابایا کی روپوشی کی اطلاعات سامنے آئی تھیں۔اس سے قبل صدر گوتابایا راجا پکشے نےاپنے عہدے سے استعفی دینے کا وعدہ کیا تھا۔

میڈیا رپورٹس میں مزید بتایا گیا ہے کہ صدرکے بھائی اورسری لنکا کے سابق وزیرخزانہ بسل راجا پکسے بھی ملک سے فرار ہوکر امریکا پہنچ گئے ہیں۔