ترکیہ سے واپسی پر وزیراعظم شہباز شریف کی لاہور میں لینڈنگ

وزیراعظم  شہباز شریف ترکیہ کے دو روزہ مصروف ترین دورے کے بعد  وفد کے ہمراہ ہفتے کی شب  وطن واپس پہنچ گئے۔

استنبول سے روانہ ہوئے ان کے خصوصی طیارے نے ہفتے کی رات بارہ  بجے لاہور کے علامہ اقبال انٹرنیشنل ائیرپورٹ پر لینڈ کیا۔ واضح رہے کہ وزیراعظم محمد شہباز شریف ترک صدر رجب طیب اردگان کی دعوت پر اعلی سطح کے وفد کے ہمراہ جمعہ کی صبح اسلام آباد سے روانہ ہوئے تھے۔  وہ جمعہ کی  دوپہر کو استنبول پہنچے تھے جہاں ان کا والہانہ استقبال کیا گیا۔

وزیراعظم پاکستان نے ترکیہ کے صدر طیب اردگان کے ہمراہ استنبول شپ یارڈ پر پاک بحریہ کیلئے چار ملجم کارویٹ جہازوں میں سے تیسرے جہاز پی ایس خیبر کا افتتاح کیا۔ وزیراعظم نے ہفتے کو بھی استنبول میں مصروف ترین دن گزارا ، بزنس کمیونٹی سے ملاقات اور خطاب کیا اور سرمایہ کاروں کو پاکستان میں انویسٹمنٹ کی دعوت دی۔ بعد ازاں وزیر اعظم ہفتے کی شام وطن واپس روانہ ہوگئے۔