سندھ کے علاقے سانگھڑ میں تیل اور گیس کے نئے ذخائر دریافت

کراچی(امت نیوز)سندھ کے علاقے سانگھڑ میں تیل اور گیس کے نئے ذخائر دریافت ہوئے ہیں۔

پاکستان اسٹاک ایکسچینج کو ارسال کیے گئے نوٹس میں او جی ڈی سی ایل نے بتایا ہے کہ کمپنی نے 26 جون کو کنویں کی کھدائی کے لیے ڈرلنگ آپریشن شروع کیا، جس کے لیے 3 ہزار 400 میٹر کھدائی کی گئی۔

ادارے نے بتایا کہ ڈرل اسٹیم ٹیسٹ کے نتائج کے مطابق کنویں سے یومیہ 2 ہزار بیرل تیل اور 1.30 ملین کیوبک فٹ گیس مل سکے گی۔

مزید بتایا گیا کہ کنویں میں بطور آپریٹر او جی ڈی سی ایل کا 100 فیصد حصہ ہے۔

کمپنی کا کہنا تھا کہ تیل و گیس کی دریافت سے مثبت اثرات مرتب ہوں گے اور اس سے تیل و گیس کی طلب و رسد کے درمیان فرق کم کرنے میں مدد ملے گی،

یاد رہے کہ رواں برس کے اوائل میں کمپنی نے سندھ کے ضلع ٹنڈو الہیار میں تیل و گیس کے ذخائر دریافت کیے تھے۔

واضح رہے کہ او جی ڈی سی ایل پبلک لمیٹڈ کمپنی ہے، جو ملک میں گزشتہ 5 دہائیوں سے تیل و گیس کی دریافت و پیداوار کر رہی ہے۔