بھارتی چیف سلیکٹر کا کھلاڑیوں بارے تہلکہ خیز انکشاف

کراچی (اُمت نیوز) بھارتی چیف سلیکٹر چیتن شرما نے انکشاف کرتے ہوئے کہا کہ کچھ بھارتی کھلاڑی اپنی فٹنس قائم رکھنے کیلئے انجیکشن لگواتے ہیں
چیتن شرما کا کہنا ہے کہ ڈوپ ٹیسٹ کے متعلق بھارتی کھلاڑیوں کوبہت معلومات ہے اور وہ جانتے ہیں کہ پکڑے جانے سے کیسے بچنا ہے۔
بھارتی میڈیا کے مطابق چیتن شرما کا کہنا تھا کہ بھارتی کرکٹ ٹیم کے کھلاڑی 100 فی صد فٹ رہنے کے لیے انجیکشن لیتے ہیں چاہے وہ 80 فی صد فٹ ہی کیوں نہ ہوں۔
یہ انجیکشن درد کش نہیں ہوتے۔ ان انجیکشنز میں ایسی دوا ہوتی ہے جو ڈوپ ٹیسٹ میں نہیں پکڑی جاسکتی۔ کھلاڑی انجیکشن لیتے ہیں اور کھیلنا شروع کر دیتے ہیں۔
انہوں نے مزید کہا کہ جسپریت بمراہ بڑی انجری کی وجہ سے جھک نہیں سکتے تھے۔ ان کے علاوہ ایک دو کھلاڑی اور ہیں جو انجیکشن لے کر کہتے ہیں کہ وہ کھیلنے کے لیے فٹ ہیں۔
واضح رہے جسپریت بمراہ کافی عرصے سے کمر کی انجری میں مبتلا ہیں جس کی وجہ سے وہ آئی سی سی ٹی 20 ورلڈ کپ 2022 سے بھی باہر ہوگئے تھے۔