یوسی 6صفورہ ٹاؤن ،پی پی درخواست پر دوبارہ گنتی میں شدید بے ضابطگیاں

کراچی(اسٹاف رپورٹر ) جماعت اسلامی کی جیتی ہوئی نشست یوسی 6صفورہ ٹاؤن پر پیپلز پارٹی کی درخواست پر دوبارہ گنتی میں شدید بے ضابطگیاں سامنے آئی ہیں۔جماعت اسلامی کے نو منتخب وائس چیئر مین انور خان کے مطابق پیپلز پارٹی اور سندھ حکومت کی چوری سامنے آگئی ہے، جماعت اسلامی کے امیدوار انور خان نے ان شدید بے ضابطگیوں کی تمام تفصیلات پر مشتمل درخواست چیف الیکشن کمشنر سکندر سلطان راجہ کو ارسال کر دی ہیں۔
تفصیلات کے مطابق بدھ کو مہر نعیم روز گورنمنٹ بوائز اسکول گلشن اقبال میں دوبارہ گنتی کے دوران ووٹوں کے تھیلے پھٹے ہوئے نکلے جس پر امیدوار وائس چیئر مین انور خان نے اعتراض کیا تاہم آر او اور ڈی آر او نے اعتراض قبول نہیں کیا اور سنگین بے ضابطگی کے باوجود گنتی کا عمل جاری رکھا۔
فارم 11 کے مطابق اسٹیشن نمبر 8میں ترازو کو 50ووٹ ملے تھے لیکن دوبارہ گنتی میں یہ 50ووٹ مسترد نکلے اور جماعت اسلامی کے امیدوار انور خان کے مطالبے کے باوجود آر او اشتیاق احمد اور ڈی آر او نے مسترد شدہ ووٹوں کا تھیلا کھولنے کا مطالبہ تسلیم نہیں کیا، دوبارہ گنتی کے دوران نہ تو غیر استعمال شدہ بیلٹ پیپر کا ریکارڈ اور نہ ہی فارم 12کا ریکارڈ چیک کرایا گیا۔

انور خان کا کہنا تھا کہ ایک پولنگ اسٹیشن فیلکن اسکول میں پیپلز پارٹی کے چیئر مین امیدوار عبد الحق بلوچ کے بھائی عبد القادر بلوچ پریزائیڈنگ افسر کی حیثیت سے تعینات تھے۔ رات گئے تک گنتی جاری تھی اور جماعت اسلامی کے اعتراضات اور شکایات کو قبول نہیں کیا گیا۔