دہشتگردی کے خلاف جاری جنگ قوم کے مستقبل کی جنگ ہے،وزیراعظم

اسلام آباد : وزیراعظم شہباز شریف نے کہا ہے کہ ملک کا تحفظ ہمارا مشن بھی ہے اور ہماری ذمہ داری بھی جو ہمیں اپنی جان سے بڑھ کر عزیز ہے۔

سماجی رابطے کی ویب سائٹ ٹویٹر پر اپنے ایک بیان میں انہوں نے لکھا کہ آج ژوب گریژن پر حملے میں 5 سیکیورٹی اہلکاروں نے فرض کی ادائیگی میں جام شہادت نوش کیا اور کئی اہلکار زخمی ہوئے۔ پاکستان کا دفاع اور سلامتی ہمارے شہداء کے مقدس خون اور غازیوں کی عظیم قربانیوں کی بدولت ہے۔

آج ژوب گیریزن پر حملے میں پانچ سیکیورٹی اہلکاروں نے فرض کی ادائیگی میں جام شہادت نوش کیا اور کئی اہلکار زخمی ہوئے۔ پاکستان کا دفاع اور سلامتی ہمارے شہداء کے مقدس خون اور غازیوں کی عظیم قربانیوں کی بدولت ہے۔ دہشت گردی کے خلاف جاری جنگ قوم کے مستقبل کی جنگ ہے۔ پچھلی دہائی میں ہماری…

— Shehbaz Sharif (@CMShehbaz) July 12, 2023

وزیراعظم کا کہنا تھا کہ دہشت گردی کے خلاف جاری جنگ قوم کے مستقبل کی جنگ ہے۔ پچھلی دہائی میں ہماری بہادر افواج اور قوم نے مل کر دہشت گردی کے ناسور کا خاتمہ کیا اور ائندہ بھی اس عفريت کو جَڑ سے اکھاڑنے کے لیے کسی بھی قربانی سے دریغ نہیں کریں گے۔

شہباز شریف نے کہا کہ اس ملک کا تحفظ ہمارا مشن بھی ہے اور ہماری ذمہ داری بھی جو ہمیں اپنی جان سے بڑھ کر عزیز ہے۔ میری دعائیں شہداء کے خاندانوں کے ساتھ ہیں۔ اللہ تعالی ان مقدس ارواح کو اپنے جوار رحمت میں جگہ دیں اور زخمیوں کو صحت یابی عطا فرمائے۔ آمین