غزہ میں مزید 208 فلسطینی جاں بحق

غزہ میں سڑسٹھویں روز بھی اسرائیلی جارحیت جاری ہے، گزشتہ 24 گھنٹے میں مز ید 208 فلسطینی شہید اور416 زخمی ہوگئے۔ غزہ میں شہید فلسطینیوں کی تعداد18 ہزار205 ہوگئی۔

اسرائیلی کی غزہ میں وحشیانہ کارروائیاں جاری ہیں۔ صیہونی فورسز کی جانب سے بچے اور خواتین سمیت عام شہریوں کو شہید کیا جارہا ہے جبکہ سول انفرا اسٹرکچر کو بھی نشانہ بنایا جارہا ہے۔

رفاہ بارڈر پر بھی اسرائیلی بمباری میں بیس فلسطینی شہید ہوئے، گزشتہ چوبیس گھنٹے میں غزہ سے تینتیس زخمی فلسطینی اور چارسو اکسٹھ غیرملکی افراد مصر منتقل کیے گئے۔

اسرائیل اب تک اقوام متحدہ کی اکتالیس تنصیبات تباہ کرچکا ہے، بمباری میں دوسو چھیانوے فلسطینی ہیلتھ ورکرز شہید ہوچکے ہیں۔

حماس کے 7 اکتوبر کے اسرائیل پر حملے کے بعد سے غزہ میں شہید فلسطینیوں کی تعداداٹھارہ ہزار دوسو پانچ ہوگئی ہے۔ اسرائیلی بمباری میں اننچاس ہزار سے زائد فلسطینی زخمی ہوچکے ہیں۔

دوسری طرف امدادی سامان لے کر سو ٹرک غزہ میں داخل ہوئے اور ایک لاکھ بیس ہزارچھ سو لیٹر ایندھن کی بھی غزہ تک رسیل ممکن ہوئی۔

ایک روز قبل المغازی کیمپ پر بمباری میں 55 فلسطینی شہید ہوئے جب کہ ایک ہی روز میں اسرائیل کے 250 حملوں میں 300 افراد شہید ہوئے۔