گھوٹکی، خوشاب اور کوہاٹ کے چند پولنگ اسٹیشنوں پر دوبارہ پولنگ کا آغاز

 

گھوٹکی، خوشاب اور کوہاٹ کے چند پولنگ اسٹیشنوں پر دوبارہ پولنگ کا آغاز ہوگیا، پولنگ بغیر کسی وقفے شام 5 بجے تک جاری رہے گی جبکہ ٹانک کے حلقے این اے 43 کے 6 پولنگ اسٹیشنز پر اتوار کو ری پولنگ ہوگی۔

عام انتخابات کے دوران پی ایس 18 گھوٹکی، این اے 88 خوشاب اور پی کے 90 کوہاٹ کے چند پولنگ اسٹیشنوں پر ری پولنگ آج ہو رہی ہے۔

مختلف وجوہات کی بنا پر مؤخر کی گئی پولنگ آج صبح 8 بجے سے شام 5 بجے تک بغیر وقفے جاری رہے گی اور ووٹر اپنا ووٹ دے سکیں گے۔

یاد رہے کہ این اے 88 خوشاب کے 26 پولنگ اسٹیشنوں، پی کے 90 کوہاٹ کے 8 اور پی ایس 18 گھوٹکی کے دو پولنگ اسٹیشنوں پر بے امنی کے واقعات پیش آئے تھے۔

بے امنی کے واقعات کے بعد الیکشن کمیشن کی جانب سے مذکورہ پولنگ اسٹیشنوں پر پولنگ کا عمل ملتوی کردیا گیا تھا۔

دوسری جانب ٹانک کم ڈیرہ اسماعیل خان میں قومی اسمبلی کے حلقہ این اے 43 کے 6 پولنگ اسٹیشنوں پر ووٹ کاسٹ نہ ہونے کی شکایت پر اتوار کو ری پولنگ ہوگی۔