کراچی کے مضافات میں اچانک بارش سے شہری حیران

بدھ 9 اکتوبر 2024, 5:53 شام قومی

کراچی کے مضافات میں اچانک تیز ہوا کے ساتھ ہونے والی بارش نے لوگوں کو حیران کردیا ہے۔ بارش کے باعث ارد گرد کے علاقوں میں موسم خوش گوار ہو گیا۔

محکمۂ موسمیات کے مطابق گرم موسم کے باعث کراچی کے شمال مغرب اور شمال مشرق میں بادل بنے۔ جس کے باعث سپرہائی وے، کاٹھور، گڈاپ، نوری آباد، بحریہ ٹاؤن، ڈی ایچ اے سٹی اور اطراف میں تیز ہواؤں کے ساتھ بارش ہوئی۔

محکمۂ موسمیات کی جانب سے کہا گیا ہے کہ کراچی کے مضافات میں گرد آلود ہوا کے ساتھ مزید کہیں کہیں ہلکی بارش ہو سکتی ہے۔

واضح رہے کہ کراچی میں کچھ روز سے خشک موسم اور گرمی کی شدت برقرار ہے۔

تاہم محکمہ موسمیات کا کہنا ہے کہ شہرمیں اگلے دو سے تین گھنٹے میں گرد آلود ہواؤں کے ساتھ بارش متوقع ہے۔