پیٹرولیم مصنوعات کی قیمتوں میں اضافے کا امکان

اسلام آباد(اُمت نیوز)مشرق وسطیٰ کے بحران کی وجہ سے بین الاقوامی قیمتوں میں اضافے کی وجہ سے پیٹرولیم کی قیمتوں میں مسلسل پانچ ہفتہ وار کمی کے بعد اب اضافے کا رحجان ہے۔

ذرائع کے مطابق پٹرول اور ہائی سپیڈ ڈیزل کی قیمتوں میں بالترتیب 5.50 روپے اور 13 روپے فی لیٹر اضافے کا تخمینہ لگایا گیا ہے، جس کا اطلاق 16 اکتوبر سے 31 اکتوبر کو ختم ہونے والے اگلے 15 دن تک ہوگا، گزشتہ دو ہفتوں میں پیٹرول کی قیمت میں اوسطاً 2.8 ڈالر فی بیرل اور ہائی سپیڈ ڈیزل کی قیمت میں تقریباً 7 ڈالر فی بیرل کا اضافہ ہوا ہے۔

حتمی شرح مبادلہ کے حساب کتاب اور موجودہ ٹیکس کی شرحوں پر منحصر ہے، پیٹرول اور ایچ ایس ڈی دونوں کی قیمتوں میں 5.50 سے 13 روپے فی لیٹر اضافے کا امکان ہے۔

حکام نے بتایا کہ بین الاقوامی مارکیٹ میں پٹرول کی اوسط قیمت تقریباً 76 ڈالر فی بیرل سے بڑھ کر تقریباً 79 ڈالر فی بیرل ہوگئی ہے۔ ہائی اسپیڈ ڈیزل بھی پچھلے 15 دن میں $80.5 سے تقریباً $87.5 فی بیرل پر چلا گیا۔