گنڈاپور کا جسٹس یحییٰ آفریدی کی تقریب حلف برداری میں شرکت کا فیصلہ

خیبرپختونخوا (اُمت نیوز)وزیرِ اعلیٰ خیبر پختون خوا علی امین گنڈاپور نے جسٹس یحییٰ آفریدی کی تقریبِ حلف برداری میں شرکت کا فیصلہ کر لیا۔

ذرائع کے مطابق علی امین گنڈاپور ایوانِ صدر میں چیف جسٹس کی حلف برداری میں شریک ہوں گے۔

حلف برداری میں شرکت کے لیے علی امین گنڈاپور 10 بجے پشاور سے روانہ ہوں گے۔

واضح رہے کہ جسٹس یحییٰ آفریدی چیف جسٹس کے عہدے کا حلف آج اٹھائیں گے۔

صدرِ مملکت آصف علی زرداری آج 11 بجے نئے چیف جسٹس سے حلف لیں گے۔

تقریبِ حلف برداری میں اعلیٰ عدلیہ کے سینئر ججز، پارلیمنٹیرینز اور سرکاری حکام شرکت کریں گے۔

اس حوالے سے ایوانِ صدر سیکریٹریٹ نے مہمانوں کو دعوت نامے جاری کر دیے ہیں۔

نامزد چیف جسٹس یحییٰ آفریدی کا کہنا ہے کہ وہ عوام کے لیے قانون کی حکمرانی یقینی بنائیں گے، یہ بھی یقینی بنائیں گے کہ ریاست کے 3 ستونوں کی خود مختاری کا اصول کامیاب ہو۔

انہوں نے کہا کہ وہ ججوں اور عدلیہ کی عزت و احترام بھی یقینی بنانے کی کوشش کریں گے۔