خالد مقبول صدیقی کا سندھ حکومت پر شدید الزام

ایم کیو ایم پاکستان کے کنوینئر ڈاکٹر خالد مقبول صدیقی نے کہا ہے کہ کراچی کے ندی نالوں کے اطراف غیر قانونی گوٹھ بسانے اور تجاوزات کی اصل ذمہ داری سندھ حکومت پر عائد ہوتی ہے۔

ان کا کہنا تھا کہ بارش کی پیشگی اطلاع موجود ہونے کے باوجود انتظامات نہ کرنا سندھ حکومت اور بلدیاتی اداروں کی مجرمانہ غفلت ہے۔

خالد مقبول صدیقی نے مزید کہا کہ سندھ حکومت نے کراچی واٹر اینڈ سیوریج کارپوریشن پر قبضہ کر کے اسے بھی تباہ کر دیا، نتیجتاً بارش کے بعد ناگن چورنگی، قیوم آباد، ایم نائن، ناظم آباد، نارتھ کراچی، ملیر، گڈاپ اور شاہراہ فیصل سمیت کئی اہم علاقے زیرِ آب آگئے۔

انہوں نے کہا کہ عوام کے ٹیکس سے بننے والی اربوں روپے کی شاہراہ بھٹو کا بارش میں بہہ جانا پیپلز پارٹی کی کرپشن کا منہ بولتا ثبوت ہے۔ ان کے مطابق غیر مقامی سندھ حکومت، بلدیاتی نمائندوں اور افسران کی نااہلی نے کراچی کو شدید نقصان پہنچایا ہے۔

ایم کیو ایم رہنما نے بتایا کہ متاثرہ علاقوں میں حق پرست اراکین اسمبلی اور کارکنوں کو ہدایت دی گئی ہے کہ وہ ریلیف سرگرمیوں کو تیز کریں اور عوام کی ہر ممکن مدد کریں۔