پاکستان میں سیاحت پائیدار ترقی کا ذریعہ بن سکتی ہے، صدر مملکت

 

صدر مملکت آصف علی زرداری نے کہا ہے کہ انتہا پسندی اور عدم برداشت پاکستان میں سیاحت کے فروغ کے لیے سب سے بڑی رکاوٹ ہیں۔

عالمی یومِ سیاحت 2025 کے موقع پر اپنے خصوصی پیغام میں صدر نے کہا کہ پاکستان میں سیاحت پائیدار ترقی کا اہم ذریعہ بن سکتی ہے۔ ان کے مطابق رواں سال یومِ سیاحت کا موضوع سیاحت اور پائیدار تبدیلی ہے جبکہ ماحولیاتی تبدیلی بھی پاکستان کی سیاحتی صنعت کے لیے ایک بڑا چیلنج ہے۔

صدر آصف زرداری نے کہا کہ گلیشیئرز کا تیز پگھلاؤ اور شدید موسمی حالات پاکستان کے سیاحتی ورثے کے لیے خطرہ ہیں۔ انہوں نے کہا کہ سیاحت نہ صرف معیشت کو فروغ دے سکتی ہے بلکہ خواتین اور نوجوانوں کو بااختیار بنانے میں بھی مددگار ثابت ہو سکتی ہے۔

ان کے مطابق حکومتِ پاکستان سیاحت کو اقوام متحدہ کے پائیدار ترقیاتی اہداف سے ہم آہنگ کر رہی ہے اور اس کے لیے گرین سرٹیفکیشن، کمیونٹی بیسڈ اور ماحولیاتی سیاحت پر توجہ دینا ہوگی۔

صدر مملکت نے کہا کہ سیاحت امن، ہم آہنگی اور ثقافتی ورثے کے تحفظ کا مؤثر ذریعہ ہے۔ پاکستان اپنی قدرتی خوبصورتی، تاریخی ورثے اور مہمان نوازی کی وجہ سے دنیا بھر کے سیاحوں کو متوجہ کرنے کی صلاحیت رکھتا ہے۔

انہوں نے کہا کہ پاکستان کو عالمی سیاحتی مرکز بنانے کے لیے حکومت، نجی شعبہ، سول سوسائٹی اور نوجوانوں کو مل کر کردار ادا کرنا ہوگا۔