وزیراعلیٰ کے پی کا ایمل ولی خان کو مکمل سکیورٹی فراہم کرنے کا حکم

پشاور: وزیراعلیٰ خیبر پختونخوا علی امین گنڈاپور نے عوامی نیشنل پارٹی کے صدر ایمل ولی خان کو مکمل سکیورٹی فراہم کرنے کی ہدایت کر دی ہے۔

ترجمان وزیراعلیٰ کے پی فراز مغل کے مطابق ایمل ولی خان کی سکیورٹی واپس لینے کا فیصلہ وفاقی حکومت کا تھا، تاہم علی امین گنڈاپور نے آئی جی خیبر پختونخوا کو حکم دیا ہے کہ سکیورٹی کسی صورت واپس نہ لی جائے۔

ترجمان نے کہا کہ ایمل ولی خان کے خاندان کو ماضی میں بھی نشانہ بنایا گیا ہے، انسانی جان کے تحفظ پر کوئی سمجھوتہ نہیں کیا جا سکتا۔

ادھر گورنر خیبر پختونخوا فیصل کریم کنڈی نے بھی کہا کہ وہ ایمل ولی سے سکیورٹی واپس لینے کے خلاف ہیں۔ ان کا کہنا تھا کہ اگر سیاسی رہنماؤں کو خطرات لاحق ہیں تو انہیں سکیورٹی فراہم کرنا ضروری ہے۔

واضح رہے کہ گزشتہ روز ایمل ولی خان نے وفاقی حکومت پر الزام لگایا تھا کہ ان کی اور ان کے خاندان کی سکیورٹی واپس لے لی گئی ہے، اور کسی بھی ناخوشگوار واقعے کی ذمہ داری وفاقی حکومت پر عائد ہوگی۔