ریاست کسی جتھے کے ہاتھوں بلیک میل نہیں ہو گی،طلال چوہدری

اسلام آباد: وزیر مملکت برائے داخلہ طلال چوہدری نے کہا ہے کہ ریاست کسی جتھے کے ہاتھوں بلیک میل نہیں ہو گی، کوشش کی جا رہی ہے کہ طاقت کا استعمال نہ کیا جائے۔ غزہ کے نام پر ہونے والے مظاہرے کا مقصد کچھ اور ہے جس کو کامیاب نہیں ہونے دیں گے۔

 پریس کانفرنس کرتے ہوئے وزیر مملکت طلال چوہدری نے مارچ کی مذمت کرتے ہوئے کہا کہ مذہب، انتہا پسندی اور ذاتی مقاصد کے لیے جتھوں کی سیاست اور احتجاج کرنے کی اجازت نہیں دی جائے گی۔

انھوں نے کہا کہ احتجاج کسی بھی سیاسی اور مذہبی جماعت اور شہریوں کا حق ہے تاہم اس کے لیے کچھ شرائط ہوتی ہیں۔

انھوں نے کہاکہ ان کا ماضی گواہ ہے جنھوں نے ماضی میں بھی سول اور فوجی املاک پر حملے کیے اور اس میں کافی لوگ جان سے گئے۔

طلال چوہدری کے مطابق جتھوں کی سیاست کی پاکستان میں کہیں گنجائش نہیں۔ پوری دنیا میں جہاں جہاں فلسطین کے لیے احتجاج کیا گیا وہاں آج خوشیاں منائی جا رہی ہیں۔

طلال چوہدری نے کہاکہ ایک بڑے المیے کے بعد اب امن کی امید پیدا ہو رہی ہے۔ اگر غزہ کے تمام اسٹیک ہولڈر خوش ہیں تو یہاں اس احتجاج کی کیا وجہ ہے۔ ان کے نام پر احتجاج کیوں ہو رہا ہے اس کی وجہ کچھ اور ہے۔