امریکہ میں ہولناک دھماکے سے اسلحہ فیکٹری صفحہ ہستی سے مٹ گئی

امریکی ریاست ٹینیسی کے شہر بکسنورٹ میں فوجی اسلحہ پلانٹ میں زوردار دھماکے کے نتیجے میں عمارت مکمل طور پر تباہ ہوگئی، متعدد ہلاکتوں کا خدشہ ظاہر کیا جا رہا ہے جبکہ 19 افراد تاحال لاپتہ ہیں۔

 

 

غیر ملکی خبر رساں ادارے کے مطابق یہ افسوسناک واقعہ ایکوریٹ اینرجیٹک سسٹمز نامی پلانٹ میں پیش آیا، جہاں دھماکا خیز مواد تیار کیا جاتا ہے۔ ہک مین کاؤنٹی کے شیرف ڈیوِس نے بتایا کہ دھماکہ اتنا شدید تھا کہ عمارت ملبے کا ڈھیر بن گئی اور اس کا کوئی نشان باقی نہیں رہا۔ ان کا کہنا تھا کہ ہلاکتوں کی درست تعداد معلوم نہیں ہو سکی، تاہم امکان ہے کہ کچھ افراد زندہ بچ گئے ہوں۔

 

سی این این کی فضائی فوٹیج میں دکھایا گیا ہے کہ جہاں پہلے فیکٹری کی عمارت موجود تھی وہاں اب صرف راکھ اور ملبہ باقی ہے۔ پارکنگ لاٹ میں بھی جلی ہوئی گاڑیاں اور تباہی کے آثار واضح نظر آ رہے ہیں۔

 

کمپنی کی ویب سائٹ کے مطابق ایکوریٹ اینرجیٹک سسٹمز ایک ایسی فرم ہے جو فوجی، ہوابازی اور تجارتی مقاصد کے لیے دھماکہ خیز مواد تیار اور محفوظ کرتی ہے۔ اس کا ہیڈکوارٹر 1300 ایکڑ رقبے پر پھیلا ہوا ہے، جس میں 8 پیداواری یونٹس اور ایک لیبارٹری شامل ہیں۔

 

 

مقامی حکام کا کہنا ہے کہ دھماکے کی وجہ معلوم نہیں ہو سکی اور ایف بی ائی تحقیقات کر رہی ہے۔