سہیل آفریدی کی نئی کابینہ میں ناراض ارکان کو شامل کرنے کا فیصلہ

خیبرپختونخوا کے نومنتخب وزیراعلیٰ سہیل آفریدی آج شام چار بجے گورنر ہاؤس پشاور میں حلف اٹھائیں گے۔ گورنر فیصل کریم کنڈی سندھ کے سرکاری دورے کو مختصر کرکے رات گئے پشاور پہنچے اور حلف برداری کی تیاریوں کا جائزہ لیا۔

عدالت عالیہ پشاور ہائیکورٹ نے گورنر کو آج شام تک وزیراعلیٰ سے حلف لینے کی ہدایت دی تھی۔ اگر گورنر دستیاب نہ ہوتے تو اسپیکر صوبائی اسمبلی کو یہ ذمہ داری دی جاتی۔ گورنر فیصل کریم کنڈی نے کہا ہے کہ وہ اپنے آئینی فرائض ایمانداری سے ادا کریں گے۔

ذرائع کے مطابق سہیل آفریدی کی نئی کابینہ میں ناراض ارکان کو بھی شامل کرنے کا فیصلہ کیا گیا ہے۔ تیمور سلیم جھگڑا، شکیل خان، فیصل ترکئی اور عاقب اللہ کو وزارتیں دیے جانے کا امکان ہے، جبکہ قاسم علی شاہ، ظاہر شاہ طورو اور احتشام علی کابینہ کا حصہ نہیں ہوں گے۔

نئی کابینہ میں مشیر خزانہ مزمل اسلم بھی شامل ہوں گے جو سہیل آفریدی کی اقتصادی ٹیم کا اہم حصہ تصور کیے جا رہے ہیں۔ پارٹی ذرائع کے مطابق حکومت کو مستحکم کرنے کے لیے تجربہ کار اور نئے چہروں کا امتزاج رکھا جائے گا۔

گورنر فیصل کریم کنڈی نے میڈیا سے گفتگو میں کہا کہ وہ سیاسی معاملات کو آئین کے دائرے میں رکھ کر نمٹائیں گے اور وفاق و صوبے کے تعلقات کو بہتر بنانے کے لیے اپنا کردار ادا کریں گے۔