پاک افغان بارڈر طورخم ساتویں روز بھی بند،تجارتی سرگرمیاں معطل

پشاور/کابل: پاک افغان بارڈر طورخم ساتویں روز بھی بند ہے، جس کے باعث دونوں ممالک کے درمیان تجارتی سرگرمیاں اور پیدل آمدورفت مکمل طور پر معطل ہو گئی ہیں۔

سرحدی کشیدگی کے سبب طورخم شاہراہ پر گاڑیوں کی لمبی قطاریں لگ گئی ہیں، اور مال بردار گاڑیوں میں لدا ہوا سامان خراب ہونے لگا ہے۔ تاجروں نے خدشہ ظاہر کیا ہے کہ اگر بارڈر جلد کھولا نہ گیا تو مزید سامان ضائع ہو سکتا ہے۔

ذرائع کے مطابق بارڈر کی بندش سے دونوں طرف اشیائے خورونوش کی قیمتوں میں اضافہ ہو رہا ہے، جس سے عام شہری بھی متاثر ہو رہے ہیں۔ تاجر اور ٹرانسپورٹرز نے حکومتوں سے مطالبہ کیا ہے کہ پاک افغان تنازع کو بامعنی مذاکرات کے ذریعے حل کیا جائے کیونکہ بارڈر پر کشیدگی کسی بھی ملک کے مفاد میں نہیں ہے۔