حماس نے مزید دو یرغمالیوں کی لاشیں اسرائیل کے حوالے کر دیں

غزہ: فلسطینی مزاحمتی تنظیم حماس نے دو مزید اسرائیلی یرغمالیوں کی لاشیں اسرائیل کے حوالے کر دی ہیں۔

عرب میڈیا کے مطابق ریڈ کراس کے تعاون سے لاشیں غزہ سے اسرائیلی حکام کے حوالے کی گئیں۔ اسرائیلی وزیراعظم نیتن یاہو کے دفتر نے اس پیش رفت کی تصدیق کرتے ہوئے کہا کہ لاشوں کو شناخت اور طبی تجزیے کے لیے اسرائیلی فرانزک سینٹر منتقل کیا گیا ہے۔

یہ کارروائی جنگ بندی معاہدے کے تحت عمل میں آئی، جس کے بعد اب تک حماس کی جانب سے 28 میں سے 11 مغویوں کی لاشیں اسرائیل کو واپس کی جا چکی ہیں۔

حماس کا مؤقف ہے کہ رفح کراسنگ کی بندش لاشوں کی حوالگی میں تاخیر کا سبب بن رہی ہے اور مزید لاشیں بارڈر کھلنے سے مشروط ہیں۔

دوسری جانب امریکی محکمہ خارجہ نے خبردار کیا ہے کہ حماس کی جانب سے جنگ بندی معاہدے کی ممکنہ خلاف ورزی کے شواہد موصول ہوئے ہیں۔ واشنگٹن کے مطابق ضامن ممالک کو اس حوالے سے آگاہ کر دیا گیا ہے اور اگر ایسا ہوا تو غزہ کے شہریوں کے تحفظ کے لیے اقدامات کیے جائیں گے۔