امریکی طیارے کی 36 ہزار فٹ کی بلندی پر پراسرار شے سے ٹکر، پائلٹ زخمی

واشنگٹن: یونائیٹڈ ایئرلائنز کی پرواز کو اُس وقت ہنگامی لینڈنگ کرنا پڑی جب 36 ہزار فٹ کی بلندی پر ایک پراسرار شے بوئنگ 737 کے شیشے سے ٹکرا گئی، جس کے نتیجے میں پائلٹ زخمی ہوگیا۔غیر ملکی میڈیا کے مطابق، یونائیٹڈ فلائٹ 1093 جو ڈینور سے لاس اینجلس جا رہی تھی، کو واقعے کے بعد سالٹ لیک سٹی میں ہنگامی طور پر اتار لیا گیا۔

سوشل میڈیا پر گردش کرنے والی تصاویر میں پائلٹ کے بازوؤں پر زخم اور خون کے نشانات دیکھے جا سکتے ہیں، جو جہاز کی سکرین کے شیشے ٹوٹنے کے باعث ہوئے۔

تصاویر میں کاک پٹ کے اندر شیشے کے ٹکڑے بکھرے ہوئے دکھائی دے رہے ہیں، جبکہ ٹکر کے مقام پر جلنے کے نشانات بھی موجود ہیں۔ایوی ایشن ماہرین کے مطابق، یہ حادثہ کسی برقی خرابی کے باعث بھی ہوسکتا ہے، تاہم ٹوٹے شیشے اور جلنے کے نشانات اس بات کی نشاندہی کرتے ہیں کہ طیارہ کسی ٹھوس چیز سے ٹکرایا ہے۔م

اہرین کا کہنا ہے کہ عام طور پر پرندے، اولے یا دیگر اشیاء نچلی پروازوں کے دوران طیاروں سے ٹکراتے ہیں، مگر یہ واقعہ 36 ہزار فٹ کی بلندی پر پیش آیا، جو انتہائی غیر معمولی ہے۔