غزہ امن منصوبے کی نگرانی،برطانوی فوج اسرائیل میں تعینات

برطانوی فوجی غزہ امن منصوبے کی نگرانی کے لیے اسرائیل میں تعینات کر دیے گئے ہیں۔

لندن میں کاروباری رہنماؤں سے خطاب کرتے ہوئے برطانوی وزیر دفاع جان ہیلی نے اس تعیناتی کی تصدیق کی اور کہا کہ برطانوی فورسز اپنی خصوصی مہارت اور تجربے کے ذریعے خطے میں طویل المدتی امن کے قیام میں اہم کردار ادا کریں گی۔

جان ہیلی کے مطابق ایک برطانوی اعلیٰ افسر کو امریکی کمانڈر کا ڈپٹی مقرر کیا گیا ہے، جو ایک سول-ملٹری آرڈی نیشن سینٹر چلائیں گے۔ اس مرکز میں مصر، قطر، ترکیہ اور متحدہ عرب امارات کے فوجی بھی شامل ہونے کی توقع ہے۔

یہ اقدام ایسے وقت میں سامنے آیا ہے جب برطانیہ کی نئی وزیر خارجہ ایویٹ کوپر نے ایک ہفتہ قبل کہا تھا کہ ان کا اسرائیل میں فوجی بھیجنے کا کوئی منصوبہ نہیں۔

مزید برطانیہ نے کہا ہے کہ جرمنی کے فوجی بھی نگرانی کے لیے تعینات کیے جائیں گے تاکہ امن منصوبے کی کامیابی کو یقینی بنایا جا سکے۔