آزاد کشمیر:وزیراعظم انوار الحق کیخلاف تحریک عدم اعتماد آج متوقع

مظفرآباد: آزاد کشمیر میں سیاسی منظرنامہ ایک بار پھر گرما گیا، وزیراعظم آزاد کشمیر کے خلاف آج تحریکِ عدم اعتماد جمع کرائے جانے کا امکان ہے۔ تاہم، نئے قائدِ ایوان کے لیے حتمی نام ابھی سامنے نہیں آیا۔

ذرائع کے مطابق، پاکستان پیپلز پارٹی نے نئے قائدِ ایوان کے لیے اپنا امیدوار لانے کا فیصلہ کر لیا ہے، جبکہ مسلم لیگ (ن) کے ارکان اسمبلی اپنی مرکزی قیادت کے فیصلے کے مطابق پیپلز پارٹی کے امیدوار کو ووٹ دیں گے۔ نئے قائدِ ایوان کے انتخاب کے بعد مسلم لیگ (ن) اپوزیشن میں بیٹھے گی۔

پارلیمانی ذرائع کے مطابق، پاکستان تحریک انصاف (پی ٹی آئی) کے چار ارکان اپوزیشن میں موجود ہیں جبکہ فارورڈ بلاک کے دس ارکان پیپلز پارٹی کے کیمپ میں شامل ہو چکے ہیں۔ پیپلز پارٹی کو اب 27 ارکان کی حمایت حاصل ہو گئی ہے، جو کہ سادہ اکثریت کے لیے درکار تعداد ہے۔

مسلم لیگ (ن) کے پاس 9 نشستیں، جبکہ وزیراعظم انوارالحق کے کیمپ میں 10 ارکان موجود ہیں۔ جموں و کشمیر پیپلز پارٹی اور مسلم کانفرنس کے پاس ایک ایک نشست ہے۔ امکان ظاہر کیا جا رہا ہے کہ انوارالحق کے کیمپ سے بھی کچھ ارکان پیپلز پارٹی کے امیدوار کے حق میں ووٹ ڈال سکتے ہیں۔

ذرائع کے مطابق، وزیراعظم انوارالحق تحریکِ عدم اعتماد کا سامنا کرنے کے لیے تیار ہیں، تاہم سیاسی جوڑ توڑ عروج پر ہے۔ آزاد کشمیر کی سیاست میں آئندہ چند گھنٹے فیصلہ کن اور نہایت اہم تصور کیے جا رہے ہیں۔