ایم ڈی کیٹ 2025: کراچی کے طلبہ کی سب پر سبقت، 41 طلبہ ٹاپ 10 میں شامل

کراچی: آئی بی اے سکھر یونیورسٹی کے تحت ہونے والے ایم ڈی کیٹ 2025 کے نتائج کے مطابق کراچی کے طلبہ نے سندھ بھر کے تمام اضلاع کے طلبہ پر بازی لے لی۔ پہلی تین پوزیشنز کراچی کے نام رہیں جبکہ ٹاپ 10 میں شامل 124 امیدواروں میں سے 41 امیدوار کراچی سے ہیں۔

ابتدائی نتائج کے مطابق سندھ بھر کے تعلیمی بورڈز سے اے ون اور اے گریڈ لانے والے طلبہ میں سے 56 فیصد امیدوار ایم بی بی ایس کے ایم ڈی کیٹ ٹیسٹ میں ناکام ہوئے جبکہ بی ڈی ایس کے لیے 48 فیصد امیدوار کامیاب نہیں ہو سکے۔ ایم بی بی ایس کے 14300 امیدواروں میں سے 55 فیصد نے 99 یا اس سے زیادہ نمبر حاصل کر کے کامیابی حاصل کی، جبکہ بی ڈی ایس کے لیے 17123 امیدواروں میں سے 50 فیصد یا اس سے زیادہ نمبر حاصل کرنے والے کامیاب ہوئے۔

نتائج میں سب سے زیادہ نمبر سید محمود خان ولد عدالت خان (کراچی ضلع غربی) نے حاصل کیے، جنہوں نے 180 میں سے 175 نمبر حاصل کیے۔ دوسرے نمبر پر فیصل اشرف خان (کورنگی) اور شیراز حسین (قمبر شہداد کوٹ) رہے، جنہوں نے 174 نمبر حاصل کیے۔ تیسرے نمبر پر محمد ریان ہمایوں (کراچی شرقی)، ماہ نور شاہنواز (کورنگی) اور حرا عابد (حیدرآباد) رہے، جنہوں نے 173 نمبر حاصل کیے۔

124 امیدوار ٹاپ 10 میں شامل رہے، جن میں 41 امیدوار کراچی کے ہیں۔

آئی بی اے سکھر یونیورسٹی کے وائس چانسلر ڈاکٹر آصف شیخ نے بتایا کہ ایم ڈی کیٹ 2025 کے عارضی نتائج کا باقاعدہ اعلان کیا جا چکا ہے۔ یکم نومبر 2025 کو شام 5 بجے تک امیدوار ای میل کے ذریعے شکایات درج کروا سکتے ہیں، جس کے بعد اتوار کو حتمی نتائج جاری کیے جائیں گے۔