دنیا میں بڑھتے تنازعات عالمی امن کے لیے خطرہ ہیں،اسحاق ڈار

 

 نائب وزیراعظم اور وزیر خارجہ اسحاق ڈار نے کہا ہے کہ دنیا میں بڑھتے تنازعات عالمی امن کے لیے خطرہ ہیں اور ان کے حل کے لیے مذاکرات اور سفارتکاری ضروری ہیں۔

اسلام آباد میں سیمینار سے خطاب کرتے ہوئے اسحاق ڈار نے کہا کہ موسمیاتی تبدیلی ایک بڑا چیلنج ہے اور عالمی معاشی منظرنامہ تبدیل ہو رہا ہے۔ جنوبی ایشیا غربت، ناخواندگی، ناگہانی آفات اور دیگر چیلنجز سے دوچار ہے۔

انہوں نے مزید کہا کہ درجہ حرارت میں اضافے اور سیلاب کے معیشت پر تباہ کن اثرات مرتب ہو رہے ہیں، اور خطے میں سیکیورٹی کا منظرنامہ بھی پیچیدہ ہے۔ پاکستان تنازعات کے حل کے لیے مذاکرات اور سفارتکاری کی حمایت کرتا ہے۔

نائب وزیراعظم نے بتایا کہ مئی میں پاک بھارت جنگ بھی خطرناک ثابت ہو سکتی تھی، بھارت نے یکطرفہ طور پر سندھ طاس معاہدہ معطل کیا، جبکہ اسرائیل نے فلسطین اور غزہ میں انسانی حقوق کی خلاف ورزی کی۔ دیرینہ مسئلہ کشمیر حل نہ ہونے سے خطے کے امن کو خطرہ لاحق ہے۔

اسحاق ڈار نے کہا کہ جنوبی ایشیا سب سے زیادہ آبادی والا خطہ ہے اور اس کے ممالک کو اپنے مسائل کے حل پر سنجیدگی سے غور کرنا ہوگا۔ مشترکہ خوشحالی کے لیے علاقائی روابط انتہائی اہم ہیں۔