ٹرمپ انتظامیہ کا بڑا فیصلہ:افغان اسپیشل امیگرنٹ ویزا معطل

امریکی صدر ڈونلڈ ٹرمپ کی انتظامیہ نے افغان شہریوں کے لیے امیگریشن پالیسی مزید سخت کر دی ہے۔ نئی پالیسی کے تحت افغان اسپیشل امیگرنٹ ویزا (SIV) سے متعلق حفاظتی استثنیٰ ختم کر دیا گیا ہے، جس کے بعد مترجمین اور دیگر اہل افراد بھی اس سہولت سے محروم ہو گئے ہیں۔

امریکی اخبار دی واشنگٹن پوسٹ کے مطابق افغانستان ان ممالک میں شامل ہے جن پر مکمل سفری پابندیاں اور امیگریشن چینلز میں مزید محدودیتیں عائد کی گئی ہیں۔ وائٹ ہاؤس کا کہنا ہے کہ یہ اقدام سکیورٹی خدشات، اسکریننگ اور معلومات کے تبادلے کے پیشِ نظر کیا گیا ہے۔

حال ہی میں ایک افغان نژاد فرد پر سنگین جرائم کے الزامات سامنے آنے کے بعد پابندیوں میں مزید سختی کی گئی ہے۔ امریکی حکام نے افغان شہریوں کی امیگریشن، شہریت اور گرین کارڈ کی درخواستوں پر عارضی پابندیاں بھی عائد کر دی ہیں۔

عالمی سطح پر بھی افغان شہریوں کے حوالے سے احتیاط بڑھتی دکھائی دے رہی ہے۔ حالیہ دنوں میں جرمنی نے پناہ گزین پروگرام معطل کیا، برطانیہ نے سخت ٹریول ایڈوائزری جاری کی، جبکہ آسٹریلیا نے بھی افغان شہریوں کے لیے پابندیوں میں اضافہ اور سفارتی اقدامات کا عندیہ دیا ہے۔