سابق ڈی جی آئی ایس آئی فیض حمید نے سزا کے خلاف اپیل دائر کر دی

اسلام آباد: سابق ڈی جی آئی ایس آئی لیفٹیننٹ جنرل ریٹائرڈ فیض حمید نے ملٹری کورٹ سے سنائی گئی سزا کے خلاف اپیل دائر کر دی ہے۔

ان کے وکیل میاں علی اشفاق کے مطابق 27 دسمبر کو اپیل دائر کی گئی، تاہم تفصیلات شیئر نہیں کی گئیں۔ یاد رہے کہ فیڈرل کورٹ مارشل نے فیض حمید کو آفیشل سیکریٹ ایکٹ کی خلاف ورزی، اختیارات کے غلط استعمال اور پاکستان آرمی ایکٹ کی خلاف ورزی کے الزامات پر 14 سال قید کی سزا سنائی تھی۔

ڈی جی آئی ایس پی آر لیفٹیننٹ جنرل احمد شریف چوہدری نے 11 دسمبر کو بتایا تھا کہ 12 اگست 2024 کو فیض حمید کے خلاف تحقیقات کا آغاز کیا گیا اور 15 ماہ کے بعد انہیں سزا سنائی گئی۔

پاکستان آرمی ایکٹ کی دفعہ 133 بی کے تحت فیض حمید کو فیلڈ جنرل کورٹ مارشل کے فیصلے کے خلاف اپیل دائر کرنے کے لیے 40 دن کی مہلت حاصل تھی۔ قوانین کے مطابق فوجی عدالت کی سزا کے خلاف اپیل کا جائزہ آرمی چیف کی بنائی گئی کورٹ آف اپیلز کرے گی اور بعد ازاں آرمی چیف کو اختیار ہوگا کہ وہ اپیل کو منظور، مسترد، معطل یا اس میں ترمیم کے احکامات جاری کریں۔

ذرائع کے مطابق اپیل میں موقف اختیار کیا گیا ہے کہ فیض حمید کو دی گئی سزا غیر قانونی اور غلط بنیاد پر تھی، پروسیکیوشن اپنا کیس ثابت کرنے میں ناکام رہی، اور مقدمے کے شفاف ٹرائل کو نظر انداز کیا گیا۔