واہ کینٹ میں قطرپلٹ شادی شدہ خاتون گھروالوں کے ہاتھوں غیرت کے نام پر قتل

واہ کینٹ کے علاقے لالہ زار کالونی میں غیرت کے نام پر شادی شدہ خاتون کوگھروالوں نے گولی مارکرقتل کردیاگیا۔ پولیس کے مطابق مقتولہ سمیرا عزیز ایک ہفتہ قبل قطر سے اپنے چچا شوکت اور فیصل کے ہمراہ پاکستان آئی تھی۔پولیس کا کہنا ہے کہ مقتولہ کو گولیاں مار کر قتل کیا گیا، لاش کو اسپتال منتقل کیے جانے کے دوران پولیس نے موقع پر پہنچ کر لاش کو تحویل میں لے لیا۔ واقعے کا مقدمہ سب انسپکٹر آصف اقبال کی مدعیت میں غیرت کے نام پر قتل کی دفعات کے تحت درج کر لیا گیا ہے۔

ایف آئی آر کے مطابق گذشتہ شام مقتولہ کے گھر ولید، اسرار اور صابر آئے، اس وقت گھر میں مقتولہ کے والد اور چچا فیصل اور شوکت بھی موجود تھے۔ ملزمان آپس میں بیٹھ کر مشورے کرتے رہے جن کی باتیں مقتولہ کی بہن ثنانے بھی سنیں۔

رات کے وقت دروازے پر دستک ہوئی جس پر مقتولہ اور اس کی بہن نے چچی کو دروازہ کھولنے سے منع کیا، تاہم چچا امتیاز نے قطر سے فون کر کے دروازہ کھولنے کا کہا۔ اس کے بعد قریبی رشتہ دار ولید اور اسرار گھر میں داخل ہوئے ، صابر دروازے پر کھڑا رہا۔ایف آئی آر میں بتایا گیا ہے کہ مقتولہ کے شوہر سلیمان نے قطر سے چچی سعیدہ کو ویڈیوکال پر ولید وغیرہ کی بات کرانے کا کہا، بعد ازاں ملزمان سمیرا عزیز کو اوپر والی منزل کے کمرے میں لے گئے جہاں رات ساڑھے دس بجے ولید اور اسرار نے پستول سے فائرنگ کر کے سمیرا عزیز کو قتل کر دیا۔

پولیس کے مطابق واردات کے بعد ملزمان ولید اور اسرار موقع سے فرار ہو گئے، کچھ دیر بعد چچا شوکت اور فیصل گھر پہنچے۔ مقدمے میں الزام لگایا گیا ہے کہ مقتولہ کے شوہر نے قطر میں اپنی اہلیہ کو کسی غیر مرد سے فون پر بات کرتے دیکھا تھا، جس کے بعد اس کے کہنے پر سمیرا عزیز کو قتل کیا گیا۔

مقتولہ کی بہن ثنا خان نے پولیس کو بیان دیتے ہوئے کہا کہ میری ہمشیرہ کو غیرت کے نام پر صلاح مشورہ کرکے قتل کیا گیا، تمام افراد گھر میں بیٹھ کر مشورہ کرتے رہے، ان کی باتیں سنیں، ولید اور اسرار نے پستول سے سمیرا عزیز کو گولیاں ماریں۔ثنا خان کا مزید کہنا تھا کہ میرے بہنوئی کو سمیرا عزیز کے غیر مرد سے فون پر بات کرنے کا شک تھا، سمیرا کو صلاح مشورے سے میرے بہنوئی سلیمان کے ایما پر قتل کیا گیا۔

پولیس حکام نے بتایا کہ چھاپے مارے جارہے ،ملزمان کو جلد گرفتار کر لیا جائے گا۔