وینزویلا کی فوج نے ڈیلسی روڈریگیز کو عبوری صدر تسلیم کر لیا

وینزویلا کے وزیرِ دفاع ولادیمیر پادرینو نے سرکاری ٹیلی ویژن پر خطاب کرتے ہوئے اعلان کیا ہے کہ فوج نے نائب صدر ڈیلسی روڈریگیز کو عبوری صدر کے طور پر اپنی حمایت کی یقین دہانی کرائی ہے۔

وزیرِ دفاع نے کہا کہ وینزویلا کی مسلح افواج ’صدر مادورو اور ان کی اہلیہ کے بزدلانہ اغوا‘ کو سختی سے مسترد کرتی ہیں۔ ان کے مطابق اس واقعے میں ’صدر کے سکیورٹی عملے کے بڑے حصے، فوجی اہلکاروں اور بے گناہ شہریوں کو بے رحمی سے قتل کیا گیا۔‘

امریکی اخبار نیویارک ٹائمز نے رپورٹ کیا ہے کہ ایک رہائشی عمارت پر حملہ ہوا ہے جس میں کم از کم 40 افراد ہلاک ہوئے ہیں، تاہم یہ واضح نہیں کہ ہلاک ہونے والے عام شہری تھے یا فوجی اہلکار۔ بی بی سی نے ان اطلاعات کی آزادانہ طور پر تصدیق نہیں کی ہے۔

وزیرِ دفاع پادرینو نے کہا کہ ’آج وینزویلا کے ساتھ جو کچھ ہو رہا ہے وہ کسی بھی ریاست یا حکومت کے ساتھ ہو سکتا ہے۔‘

انھوں نے عوام سے اپیل کی کہ وہ ملک میں معمولاتِ زندگی دوبارہ شروع کریں اور کام، تجارت اور تعلیم کو جاری رکھیں۔