کراچی کے پلازہ میں آگ سے5افرادجاں بحق،رینجرزکاریسکیوآپریشن

 کراچی  صدرمیں ایم اے جناح روڈ پر واقع شاپنگ پلازہ گل پلازہ میں خوفناک آگ لگنے کے نتیجے میں 3افراد جاں بحق , 20 زخمی ہوگئے۔مزید2افراد کی لاشیں نکالی گئیں ، جس کے بعد اموات کی تعداد 5 ہوگئی،  بیسمینٹ میں اورکئی افراد پھنسے ہونے کا خدشہ بھی ظاہر کیا گیا ہے۔ چیف فائر آفیسر ہمایوں خان کے مطابق 7 گھنٹوں بعد 40 فیصد آگ پر قابو پایا گیا،انہوں نے بتایا کہ عمارت میں زوردار دھماکا ہوا، جس کے بعد آگ مزید پھیل گئی ، دھماکا گیس لیکج  سے ہوا۔

ریسکیو ذرائع کے مطابق عمارت میں آتشزدگی کے باعث دم گھٹنے کی وجہ سے اموات ہوئیں اوردھویں کے باعث متعدد افراد کی حالت غیر ہوگئی، جنہیں اسپتال منتقل کردیا گیا۔

پاکستان رینجرز نے ریسکیو اور ریلیف آپریشن کیا۔ ہنگامی ٹیمیں صورتحال پر قابو پانے، متاثرہ افراد کی مدد کرنے اور عوامی تحفظ کو یقینی بنانے کے لیے سائٹ پر فعال ہوگئیں۔ لوگوں کو نکالنے، فوری مدد فراہم کرنے اور مزید نقصان کو روکنے کے لیے کوششیں جاری ہیں، حکام صورتحال پر گہری نظر رکھے ہوئے ہیں۔

آگ  کےشدت اختیار کرنے پر فائر بریگیڈ اور ریسکیو حکام نے واٹر کارپوریشن سے فوری مدد طلب کرلی۔ ترجمان واٹر کارپوریشن کے مطابق نیپا اور صفورہ ہائیڈرنٹس پر ایمرجنسی نافذ کردی گئی اور فوری طور پر واٹر ٹینکرز جائے وقوعہ پر روانہ کیے گئے۔

 20 فائر ٹینڈرز، 4 اسنارکل اور ایک واٹر باوزر کی مدد سے آگ پر قابو پانے کی کوششیں جاری ہیں ، آگ کو آگے بڑھنے سے روک دیا گیا ہے۔۔ چیف فائر افسر کا کہنا ہے کہ آگ کو تیسرے درجے کی قرار دے کر شہر بھر سے فائر ٹینڈرز طلب کرلیے گئے۔ آگ کی و جہ سے عمارت کے ایک حصے کا پلر گر گیا ۔

ریسکیو حکام کا کہنا ہے کہ شاپنگ پلازہ میں کئی افراد کے پھنسے ہونے کی اطلاع ہے،  آگ شاپنگ پلازہ کے میز نائن فلور پر لگی، آگ نے گراؤنڈ اور فرسٹ فلور کی دکانوں کو بھی لپیٹ میں لے لیا، شاپنگ پلازہ گراؤنڈ ، میز نائن پلس دو فلور پر مشتمل ہے۔

میڈیا رپورٹس کے مطابق شاپنگ پلازے میں ایک ہزار سے زیادہ دکانیں موجود ہیں، اور اندر موجود لوگوں کو بحفاظت نکالنے کے لیے ریسکیو کارروائیاں جاری ہیں۔

آتشزدگی کا واقعہ گل پلازہ میں پیش آیاہے۔ یہ پلازہ ایم اے جناح روڈ پرہے۔حکام فائر بریگیڈکے مطابق ،آگ پلانے کے میزنائن فلورپر لگی ہے۔

آتشزدگی کے حوالے سے سامنے آنے والی وڈیوزمیں آگ بھڑکنے کے خوف ناک مناظر دیکھے جاسکتے ہیں۔شعلوں کے درمیان دھویں کے گہرے بادل نکلتے نظر آرہے ہیں۔

ٹریفک کو تبت چوک سے جوبلی کی طرف اور انکل سریا چوک سے ٹینکر چورنگی اور گارڈن چوک کی طرف منتقل کردیا گیا ہے۔

وزیر داخلہ سندھ ضیاء الحسن لنجار نے کہا ہے کہ شہریوں کیلئے محفوظ راستے کیلئے متبادل ٹریفک روٹس بنائے جائیں، ایس ایس پی سٹی آگ لگنے کی وجوہات کا پتا لگائیں۔

ترجمان ریسکیو 1122 نے بتایا کہ گل پلازہ کے قریب دکانوں میں آتشزدگی کی اطلاع ملی ہے اور سینٹرل کمانڈ اینڈ کنٹرول ریسکیو 1122 کو اطلاع موصول ہوتے ہی فائر اینڈ ریسکیو ٹیم بمعہ ایمبولینس اور فائر بریگیڈ ٹرک جائے وقوعہ پر روانہ کردی گئی ہیں۔انہوں نے بتایا کہ ریسکیو 1122 کی جانب سے آگ پر قابو پانے کا عمل جاری ہے۔

ترجمان واٹر بورڈ نے بیان میں بتایا کہ گل پلازہ میں آتشزدگی کے واقعے پر فائر بریگیڈ اور ریسکیو 1122 نے واٹر کارپوریشن سے فوری مدد طلب کرلی ہے اور سی ای او احمد علی صدیقی کی ہدایت پر نیپا اور صفورہ ہائیڈرنٹس پر ایمرجنسی نافذ کردی گئی ہے۔

انہوں نے کہا کہ واٹر کارپوریشن کی جانب سے فوری طور پر واٹر ٹینکرز جائے وقوع پر روانہ کردیے گئے ہیں، انچارج ہائیڈرنٹس سیل محمد صدیق تنیو فائر بریگیڈ اور ریسکیو حکام سے مسلسل رابطے میں ہیں۔

ترجمان نے بتایا کہ فوکل پرسن سی ای او برائے ہائیڈرنٹس سیل شہباز بشیر آپریشن کی خود نگرانی کر رہے ہیں، آگ بجھانے کے عمل میں فائر بریگیڈ کو بلا تعطل پانی کی فراہمی یقینی بنائی جا رہی ہے اور واٹر کارپوریشن فائر بریگیڈ اور ریسکیو اداروں کے ساتھ بھرپور تعاون کر رہا ہے۔

ترجمان واٹر بورڈ کا کہنا تھا کہ آتشزدگی پر مکمل قابو پانے تک واٹر ٹینکرز کی فراہمی جاری رہے گی اور شہریوں کے جان و مال کے تحفظ کے لیے ریسکیو اداروں کے ساتھ ہر ممکن تعاون جاری ہے۔