پنجاب میں بارشوں کی پیشگوئی،پہاڑی علاقوں میں شدید برفباری متوقع

لاہور: پنجاب کے مختلف اضلاع میں آج سے 23 جنوری تک بارشوں کا امکان ہے، جبکہ مری، گلیات اور دیگر پہاڑی علاقوں میں شدید برفباری کی توقع ہے۔

پنجاب ڈیزاسٹر مینجمنٹ اتھارٹی (پی ڈی ایم اے) نے لاہور، سرگودھا، گجرانوالہ، ساہیوال، ملتان، فیصل آباد، ڈیرہ غازی خان اور بہاولپور ڈویژن میں بھی بارشوں کی پیشگوئی کی تصدیق کی ہے۔

رپورٹس کے مطابق آئندہ چند روز میں موسم عمومی طور پر سرد اور خشک رہے گا، تاہم مختلف شہروں میں وقفے وقفے سے بارش اور پہاڑی علاقوں میں برفباری متوقع ہے۔

پی ڈی ایم اے نے متعلقہ محکموں کو الرٹ رہنے اور حفاظتی اقدامات یقینی بنانے کی ہدایت کی ہے تاکہ ممکنہ سیلاب، لینڈ سلائیڈنگ یا دیگر قدرتی آفات سے بروقت نمٹا جا سکے۔ خاص طور پر مری میں ضلعی انتظامیہ اور دیگر اداروں کو چوکس رہنے کی ہدایات دی گئی ہیں۔

ڈی جی پی ڈی ایم اے نے عوام سے اپیل کی ہے کہ وہ موسم کی تازہ صورتحال پر نظر رکھیں، غیر ضروری سفر سے گریز کریں اور احتیاطی تدابیر اختیار کریں تاکہ کسی بھی ممکنہ نقصان سے بچا جا سکے۔