27جنوری شام تک آزادکشمیر میں شدید برف باری متوقع۔ مری میں نیا سپیل

 

مری میں شدیدبرفباری کا نیا سپیل شروع ہو گیا ہے جس کے پیش نظر ضلعی انتظامیہ نے حفاظتی انتظامات مزید سخت کر دیے ہیں۔ 27جنوری شام تک آزاد کشمیر کے بالائی اور پہاڑی علاقوں میں بارش ،اور شدید برفباری کی پیشگوئی ہے

 

ڈپٹی کمشنر مری کی ہدایات پر تمام متعلقہ اداروں کے افسران اور اہلکار فیلڈ میں موجود ہیں اور اپنی ذمہ داریاں احسن طریقے سے سر انجام دے رہے ہیں۔برف ہٹانے کے لیے ہیوی مشینری کا استعمال جاری ہے ۔ پھسلن سے بچا ئوکے لیے مختلف شاہراہوں پر نمک چھڑکا جا رہا ہے۔ ٹریفک پولیس کی جانب سے خصوصی مینجمنٹ پلان پر عملدرآمد جاری ہے تاکہ کسی قسم کی رکاوٹ یا حادثے سے بچا جا سکے۔

 

ڈپٹی کمشنر مری آغا ظہیر عباس شیرازی کا کہنا ہے کہ محکمہ موسمیات کی جانب سے برفباری کی پیش گوئی کے پیش نظر ضلعی انتظامیہ مکمل طور پر متحرک ہے اور مقامی آبادی کے ساتھ ساتھ سیاحوں کا تحفظ اولین ترجیح ہے۔انہوں نے مری کی جانب سفر کرنے والے سیاحوں کو ہدایت کی کہ وہ موسمی صورتحال سے باخبر رہیں اور ضلعی انتظامیہ کی جانب سے جاری کردہ ایڈوائزری پر سختی سے عمل کریں۔

 

ڈپٹی کمشنر نے مزید کہا کہ محفوظ سفر کو یقینی بنانے کے لیے سیاح انتظامیہ کے ساتھ مکمل تعاون کریں۔

دریں اثنا، راولپنڈی اور اسلام آبادمیں ہلکی بارش ہوئی ہے۔محکمہ موسمیات کی پیش گوئی کے مطابق مزید بارش بھی متوقع ہے۔

سٹیٹ ڈیزاسٹر مینجمنٹ اتھارٹی (SDMA)کے مطابق 27جنوری شام تک آزاد کشمیر کے بالائی اور پہاڑی علاقوں میں بارش ،اور شدید برفباری کی پیشگوئی کی گئی ہے۔ بالائی علاقوں میں سڑکوں پر پھسلن، آمدورفت میں مشکلات اور راستوں کی بندش کا خدشہ ہے۔لینڈ سلائیڈنگ اور برفانی تودے گرنے کا امکان ہے۔شہری اور خصوصاً سیاح غیر ضروری سفر سے اجتناب کریں.شدید سردی کے پیشِ نظر گرم کپڑوں کا استعمال یقینی بنائیں۔مقامی انتظامیہ اور ایس ڈی ایم اے کی ہدایات پر عمل کریں ۔ہنگامی صورتحال میں ایس ڈی ایم اے کے مرکزی کنٹرول روم سٹیٹ ایمرجنسی آپریشن سینٹر ، 05822921643ضلعی انتظامیہ، ریسکیو 1122 اور ٹورسٹ پولیس کے ساتھ فوری رابطہ کریں۔