سانحہ گل پلازہ میں شہداء کے اہلخانہ کو 1 کروڑ روپے دینے کی منظوری

 کراچی: سندھ کابینہ نے سانحہ گل پلازہ میں شہید ہونے والوں کے اہلخانہ کو ایک کروڑ روپے فی کس دینے کی منظوری دی ہے۔

وزیراعلیٰ سندھ مراد علی شاہ کی زیر صدارت صوبائی کابینہ کے اجلاس میں بتایا گیا کہ سانحہ میں متاثر ہونے والے دکانداروں کو 5-5 لاکھ روپے کچن اور یوٹیلیٹی اخراجات کے لیے کمشنر کے ذریعے فراہم کیے جا رہے ہیں۔

کابینہ نے متاثرہ دکانداروں کو ایک ایک کروڑ روپے بلاسود قرض دینے کی بھی منظوری دی۔ وزیراعلیٰ سندھ نے کہا کہ یہ قرض دکانداروں کو دوبارہ کاروبار شروع کرنے کے لیے دیا جا رہا ہے اور اس پر واجب الادا سود حکومت سندھ ادا کرے گی۔

مراد علی شاہ نے کہا کہ تمام متاثرہ دکانداروں کو دو ماہ کے اندر کاروبار شروع کرنے کے لیے دکان کی سہولت فراہم کی جائے گی اور حکومت دکانداروں کے تحفظ اور سہولت کے لیے ہر ممکن اقدامات کرے گی۔