گوادر پاکستان کا اسٹریٹجک تجارتی اور عالمی رابطہ کاری کا مرکز بنتا جا رہا ہے،احسن اقبال

 

وفاقی وزیر منصوبہ بندی پروفیسر ڈاکٹر احسن اقبال نے کہا ہے کہ گوادر پاکستان کو عالمی تجارتی نظام سے جوڑنے والا ایک اسٹریٹجک مرکز بنتا جا رہا ہے۔ یہ بات انہوں نے گوادر میں منعقدہ سیمینار اور ایگزیبیشن ’’گوادر جدید ساحلی شہر 2026‘‘ کے دوران خطاب میں کہی، جس میں ملکی و غیر ملکی ماہرین، پالیسی سازوں اور کاروباری شخصیات نے شرکت کی۔

احسن اقبال نے گوادر بندرگاہ کی صنعتی اور تجارتی ترقی کو قومی ترجیح قرار دیتے ہوئے کہا کہ حکومت شہر کو جدید بندرگاہی مرکز میں تبدیل کرنے کے لیے بھرپور اقدامات کر رہی ہے۔ سیمینار میں سرمایہ کاری، پالیسی سازی، سکیورٹی اور پائیدار ترقی کے اہم موضوعات پر تفصیلی گفتگو کی گئی۔

سینیٹر مشاہد حسین سید نے گوادر کو علاقائی تجارت، بندرگاہی معیشت اور عالمی رابطہ کاری کا ایک اہم اسٹریٹجک مرکز قرار دیا۔ ایم ڈی پاکستان ٹورازم ڈیولپمنٹ کارپوریشن آفتاب الرحمٰن رانا نے شہر کے سیاحتی امکانات کی اہمیت اجاگر کی، جبکہ ڈاکٹر محمد جمیل احمد نے گوادر پورٹ کی لاجسٹکس اور علاقائی تجارتی صلاحیتوں پر روشنی ڈالی۔

ڈاکٹر حسن داؤد بٹ نے صنعتی ترقی اور اسپیشل اکنامک زونز کے منصوبوں پر بات کرتے ہوئے کہا کہ یہ اقدامات ملکی معیشت میں نمایاں کردار ادا کریں گے۔ ڈین نسٹ یونیورسٹی ڈاکٹر اشفاق حسن خان نے مقامی آبادی کی ترقی اور روزگار کے مواقع بڑھانے پر زور دیا۔ شرکاء نے گوادر سیمینار 2026 کو پاکستان کی قومی معاشی ترقی کے لیے ایک اہم سنگِ میل قرار دیا۔