کمپیوٹرائز فٹنس کے بغیر کوئی گاڑی سڑک پر نہیں چل سکے گی،شرجیل میمن

 

سندھ کے سینئر وزیر شرجیل میمن نے کہا ہے کہ بغیر کمپیوٹرائز فٹنس کے اب کوئی گاڑی سڑک پر نہیں چل سکتی۔ انہوں نے بتایا کہ سندھ میں موٹر گاڑیوں کے پورے نظام کو کمپیوٹرائز کر دیا گیا ہے اور اس کے بعد ہر گاڑی کی فٹنس لازمی طور پر کمپیوٹرائزڈ ہونی چاہیے۔

شرجیل میمن نے مزید کہا کہ محکمہ صحت نے ایمبولینسز کے لیے واضح ہدایات جاری کی ہیں کہ کن حالات میں سائرن اور لائٹس استعمال کی جائیں اور مریض کو اسپتال منتقل کرنے کے دوران ہی سائرن بجایا جائے۔

ان کا کہنا تھا کہ محکمہ ٹرانسپورٹ مزید نئی بسوں کی خریداری کے عمل میں مصروف ہے، کچھ بسیں پہلے ہی پورٹ پر موجود ہیں، جبکہ حکومت سندھ نے مزید 500 بسوں کی خریداری کی منظوری دے دی ہے۔ شرجیل میمن نے کہا کہ ہر شہری کو بہتر ٹرانسپورٹ سہولت فراہم کرنا حکومت سندھ کی اولین ترجیح ہے۔