متحدہ عرب امارات کو براہموس میزائل فروخت کی کوششیں شروع

نئی دہلی میں بھارتی حکومت متحدہ عرب امارات کے ساتھ اپنے جدید دفاعی نظام بشمول سپرسانک کروز میزائل براہموس اور ایئر ڈیفنس سسٹم اکاشٹیئر کی فروخت پر بات چیت کر رہی ہے۔ ذرائع کے مطابق یہ مذاکرات ابتدائی مرحلے میں ہیں تاہم تیزی سے آگے بڑھ رہے ہیں۔

ذرائع کا کہنا ہے کہ امارات نے ان بھارتی ہتھیاروں میں دلچسپی ظاہر کی ہے، جو اس بات کی علامت ہے کہ وہ روایتی امریکی اسلحہ سپلائرز سے ہٹ کر بھی خریداری پر غور کر رہا ہے۔

بات چیت میں براہموس میزائل کے ساتھ ساتھ اکاشٹیئر ایئر ڈیفنس سسٹم کی ممکنہ فروخت بھی شامل ہے، جو بھارت کی جانب سے تیار کردہ جدید دفاعی ٹیکنالوجی ہے۔

رپورٹس کے مطابق متحدہ عرب امارات خطے میں جنگ اور ایران کی جانب سے حملوں کے بعد اپنی دفاعی صلاحیت بڑھانے اور اسٹریٹ آف ہرمز جیسے اہم راستوں کے تحفظ کے لیے مختلف ممالک سے اسلحہ خریدنے پر غور کر رہا ہے۔

ذرائع نے یہ بھی بتایا کہ ان معاہدوں کے لیے روس کی منظوری درکار ہوگی کیونکہ براہموس میزائل بھارت اور روس کا مشترکہ منصوبہ ہے، تاہم اسے بڑی رکاوٹ نہیں سمجھا جا رہا۔