پاکستان کی سلامتی اور دفاع پر کوئی سمجھوتہ نہیں،مسلح افواج کا یوم آزادی پر عزم

اسلام آباد: یومِ آزادی کے موقع پر پاکستان کی مسلح افواج نے ملکی سلامتی، خودمختاری، امن اور دفاع کے تحفظ کے عزم کا اعادہ کیا ہے۔

مسلح افواج کے جوانوں نے اپنے پیغام میں کہا کہ وطن عزیز کا دفاع اور عوام کی حفاظت ان کی بنیادی ذمہ داری ہے اور اس مقصد کے لیے وہ ملک کی سرحدوں پر ہر وقت تیار ہیں۔

جوانوں کا کہنا تھا کہ دشوار گزار پہاڑی علاقوں سے لے کر دیگر حساس محاذوں تک پاک فوج کے اہلکار قومی سلامتی کے تحفظ کے لیے اپنی ذمہ داریاں انجام دے رہے ہیں اور کسی بھی چیلنج کا مقابلہ کرنے کے لیے ہمہ وقت تیار ہیں۔

مسلح افواج نے اس عزم کا بھی اظہار کیا کہ ملک میں امن و استحکام کے قیام اور قومی ترقی کے لیے اپنا کردار جاری رکھا جائے گا۔ جوانوں کے مطابق پاکستان کا مستقبل محفوظ، مضبوط اور خوشحال بنانا قومی ذمہ داری ہے جس میں وہ اپنا حصہ ادا کرتے رہیں گے۔

جوانوں نے کہا کہ پاکستان ان کی شناخت اور وطن ہے، جبکہ اس کی حفاظت ان کے لیے فرض اور اعزاز ہے۔ ملکی دفاع کے لیے وہ اپنی ذمہ داریاں پوری لگن کے ساتھ انجام دیتے رہیں گے۔

یومِ آزادی پر مسلح افواج نے واضح کیا کہ پاکستان کی سلامتی، خودمختاری اور امن کے تحفظ کے لیے دفاعی ذمہ داریاں پوری قوت کے ساتھ جاری رکھی جائیں گی اور وطن کے دفاع کے لیے کسی قربانی سے دریغ نہیں کیا جائے گا۔