فیلڈ مارشل عاصم منیر کا سابق فوجیوں کے اعزاز میں استقبالیہ

یومِ آزادی کے موقع پر فیلڈ مارشل سید عاصم منیر نے پاک فوج کے سابق افسران اور جوانوں کے اعزاز میں استقبالیہ دیا، جس میں بڑی تعداد میں ریٹائرڈ فوجی اہلکاروں نے شرکت کی۔

پاک فوج کے شعبہ تعلقاتِ عامہ کے مطابق تقریب کے دوران فیلڈ مارشل سید عاصم منیر نے ملکی دفاع اور قومی سلامتی کے لیے سابق فوجیوں کی خدمات کو سراہا اور ان کی قربانیوں کو خراجِ تحسین پیش کیا۔

انہوں نے کہا کہ قومی استقامت کو مضبوط بنانے میں سابق فوجیوں کا کردار اہم ہے۔ ان کے تجربے اور رہنمائی کو پاک فوج کا قیمتی ادارہ جاتی اثاثہ قرار دیتے ہوئے فیلڈ مارشل عاصم منیر نے کہا کہ بدلتے ہوئے سکیورٹی حالات سے نمٹنے کے لیے سابق فوجیوں کی رہنمائی اہمیت رکھتی ہے۔

فیلڈ مارشل سید عاصم منیر نے ملک کے دفاع کے لیے سابق فوجیوں کی گراں قدر خدمات اور عمر بھر کی کاوشوں کو بھرپور خراجِ تحسین پیش کیا
قومی استحکام کو مضبوط بنانے میں سابق فوجیوں کے مسلسل کردار کو بھی سراہا
سابق فوجیوں کا تجربہ، رہنمائی اور مسلسل وابستگی ایک قیمتی ادارہ جاتی اثاثہ ہے pic.twitter.com/PzarSZvD8G

— Ali Raza Shaaf (@AliRazaShaaf) August 15, 2026

آئی ایس پی آر کے مطابق سابق فوجیوں نے پاک فوج کی قیادت پر اعتماد کا اظہار کرتے ہوئے ملک کو درپیش نئے سکیورٹی چیلنجز سے نمٹنے کے لیے مسلح افواج کی حمایت جاری رکھنے کے عزم کا اظہار کیا۔

سابق فوجیوں نے قومی اتحاد، امن، استحکام اور ملکی خوشحالی کے لیے اپنا کردار ادا کرتے رہنے کے عزم کا بھی اعادہ کیا۔

استقبالیے کے دوران ملکی دفاع کے لیے سابق فوجیوں کی خدمات، قربانیوں اور طویل تجربے کو سراہا گیا۔