ایران نے میرے بیٹے کو قتل کرنے کی کوشش کی, نیتن یاہو

اسرائیلی میڈیا نے وزیر اعظم بنیامین نیتن یاہو کے خاندان سے متعلق ایک مبینہ قاتلانہ حملے کی اطلاع دی ہے، جس کی تفصیلات کئی ماہ تک سیکیورٹی اور فوجی سنسر شپ کے تحت پوشیدہ رہنے کا دعویٰ کیا گیا ہے۔

رپورٹ کے مطابق واقعہ اس وقت پیش آیا جب نیتن یاہو کے بڑے بیٹے یائر نیتن یاہو بیرون ملک موجود تھے۔ تاہم ابتدائی اطلاعات میں یہ واضح نہیں کیا گیا کہ آیا یائر نیتن یاہو خود مبینہ حملے کا براہ راست ہدف تھے یا نہیں۔

مقامی میڈیا کے مطابق اسرائیلی سیکیورٹی حکام کو مبینہ واقعے کے بارے میں کئی ماہ سے معلومات تھیں، تاہم معاملے کی حساس نوعیت کے باعث اس کی تفصیلات عوام کے سامنے نہیں لائی گئیں۔

رپورٹس میں یہ بھی کہا گیا ہے کہ حالیہ معلومات کو شن بیت سیکیورٹی سروس کی جانب سے نیتن یاہو کے خاندان کے لیے سیکیورٹی انتظامات میں اضافے کے فیصلے کے تناظر میں دیکھا جا رہا ہے۔

اسرائیلی میڈیا کے مطابق سیکیورٹی انتظامات میں نیتن یاہو کی اہلیہ سارہ نیتن یاہو کے لیے تاحیات سیکیورٹی فراہم کرنے کا فیصلہ بھی شامل ہے۔

تاہم مبینہ حملے کی مکمل نوعیت، اس کے ممکنہ ہدف اور ذمہ دار افراد سے متعلق مزید تفصیلات تاحال سامنے نہیں آئی ہیں۔ حکام کی جانب سے معاملے پر مزید معلومات سامنے آنے کے بعد ہی صورتحال مکمل طور پر واضح ہوسکے گی۔