پمز نرسری آتشزدگی کے دوران کیا ہوا؟عینی شاہدین نے تفصیلات بتادیں

اسلام آباد: پمز اسپتال کی نرسری میں پیش آنے والی آتشزدگی کے دوران موجود ایک عینی شاہد نے واقعے کی صورتحال بیان کردی۔

عینی شاہد ین کے مطابق آگ لگنے کے بعد اسپتال کے اندر دھواں تیزی سے پھیل گیا، جس کے باعث لوگوں میں خوف و ہراس پھیل گیا اور متعدد افراد اپنی جان بچانے کے لیے باہر نکلنے کی کوشش کرنے لگے۔

پمز اسپتال میں آگ لگنے کے فوری بعد کیا صورتحال تھی عملہ بچے چھوڑ کیسے بھاگا ایک اور عینی شاہد نے تفصیلات بتادیں pic.twitter.com/hDTWwh8tKv

— Mahrosh Pervaiz (@MahroshPervaiz1) August 26, 2026

عینی شاہد نے بتایا کہ صبح کے وقت آگ لگنے کی اطلاع کے بعد بعض افراد نے نرسری تک پہنچنے کی کوشش کی، تاہم سیکیورٹی اہلکاروں نے انہیں اندر جانے سے روک دیا۔ بعد ازاں کچھ لواحقین خود اندر داخل ہوئے اور اوپری منزل کی جانب گئے، جہاں شدید دھواں موجود تھا۔

ان کے مطابق نرسری کے دونوں دروازے بند تھے اور انہیں کھولنے کی کوشش کی گئی، تاہم دروازے فوری طور پر نہیں کھل سکے۔ اسی دوران دھواں اوپری منزل تک پہنچ گیا اور خواتین سمیت دیگر افراد تیزی سے نیچے کی طرف آنے لگے۔

عینی شاہدین کی گفتگو 🚨
پمز اسپتال میں جیسے ہی آگ لگی تو اسٹاف بھاگ گیا، والدین اپنی مدد آپ کے تحت خود ہی وارڈ کے شیشے توڑتے رہیں، ریسکیو کا عملہ بھی دو گھنٹے بعد آیا۔🤬۔۔۔ pic.twitter.com/HE0cNaYeH8

— Hassan Jan (@HassanJan0336) August 26, 2026

عینی شاہد کا کہنا تھا کہ ریسکیو اہلکاروں نے بچوں کو نرسری سے باہر نکالا تو صورتحال انتہائی دلخراش تھی اور کئی بچوں کے جسم جھلسنے سے شدید متاثر ہوچکے تھے۔

واقعے کے بعد ریسکیو ٹیموں نے آگ پر قابو پانے کے لیے کارروائی کی اور متاثرہ حصے میں کولنگ کا عمل بھی کیا گیا۔

واضح رہے کہ پمز اسپتال کی نرسری میں ہونے والی آتشزدگی کے نتیجے میں نومولود بچوں کی ہلاکتیں ہوئی ہیں، جبکہ واقعے کی وجوہات اور انتظامی معاملات سے متعلق تحقیقات کا عمل جاری ہے۔