کویتی وزیردفاع کافیلڈمارشل عاصم منیر سےعلاقائی سلامتی اور تعاون پر تبادلہ خیال
شیخ عبداللہ علی عبداللہ السلیم الصباح کی قیادت میں اعلیٰ سطح وفد کا دورہ جی ایچ کیو
فائل فوٹو
کویت کے وزیر دفاع شیخ عبداللہ علی عبداللہ السلیم الصباح کی قیادت میں اعلیٰ سطح کویتی وفد نے جنرل ہیڈکوارٹرز (جی ایچ کیو) راولپنڈی میں چیف آف آرمی اسٹاف و چیف آف ڈیفنس فورسز (سی ڈی ایف) فیلڈ مارشل سید عاصم منیر سے ملاقات کی۔
وفد میں کویتی مسلح افواج کے چیف آف جنرل اسٹاف عزت مآب لیفٹیننٹ جنرل خالد درج سعد الشریعان بھی شامل تھے۔
ملاقات میں باہمی دلچسپی کے امور، علاقائی سلامتی اور دوطرفہ دفاعی تعاون پر تبادلہ خیال کیا گیا۔ دونوں جانب سے ادارہ جاتی تعلقات مزید مضبوط بنانے اور دونوں برادر ممالک کے درمیان باہمی مفاد پر مبنی دفاعی تعاون کو وسعت دینے کے عزم کا اعادہ کیا گیا۔
کویتی وفد نے علاقائی امن و استحکام کے لیے پاک فوج کی پیشہ ورانہ صلاحیت، آپریشنل مہارت اور قابلِ قدر خدمات کو سراہا۔
ملاقات کے دوران پاکستان اور کویت نے اپنے تاریخی اور برادرانہ تعلقات کو مزید مستحکم کرتے ہوئے مضبوط، دیرپا اور باہمی مفاد پر مبنی دفاعی شراکت داری میں تبدیل کرنے کے عزم کا اعادہ کیا، جو علاقائی سلامتی اور استحکام میں معاون ثابت ہوگی۔