منشیات بیچنے والا پولیس افسر پکڑا گیا

کراچی (اسٹاف رپورٹر)شیرشاہ پولیس نے کارروائی کرتے ہوئے سرجانی ٹاؤن تھانے میں تعینات پولیس کے اسسٹنٹ سب انسپکٹر کو گرفتار کرلیا ۔ شیرشاہ پولیس نے کارروائی کرتے ہوئے منشیات فروش ریاض کو گرفتار کرتے ہوئے اسکے قبضے سے بھاری مقدار میں منشیات برآمد کرلی۔ ایس ایچ او مختیار پہنور نے ’’امت‘‘ کو بتایا کہ گرفتار ہونے والا منشیات فروش ریاض اے ایس آئی ہے اور اسکی پوسٹنگ سرجانی ٹاؤن تھانے میں ہے ، پولیس کا کہنا ہے کہ گرفتار ہونے والا پولیس افسر شیرشاہ کے مختلف علاقوں میں منشیات فروخت کرتا تھا اور منشیات فروخت کرنے کے بعد علاقے سے چلا جاتا تھا۔ پولیس اہلکار جمعرات کے روز بھی شیرشاہ کے علاقے میں منشیات فروخت کررہا تھا کہ پولیس نے اطلاع ملتے ہی کارروائی کرتے ہوئے پولیس افسر کو گرفتار کرکے اسکے قبضے سے منشیات برآمد کرتے ہوئے اسکے خلاف مقدمہ درج کرلیا۔