اورنگی پولیس سے مقابلے میں ڈاکو ہلاک

کراچی(اسٹاف رپورٹر)اورنگی پولیس نے مقابلے میں ڈاکو ہلاک کر کے اسکے ساتھی کو زخمی حالت میں گرفتار کرلیا۔ تفصیلات کے مطابق اقبال مارکیٹ کے علاقے اورنگی سیکٹر ساڑھے 11 یعقوب آباد منہاج الشریعہ مدرسہ کے برابر والے گھر میں 2 مسلح موٹر سائیکل سوار ملزمان خاتون کو یرغمال بنا کر گھر میں داخل ہورہے تھے کہ اس نے شور مچا دیا، چیخ و پکار سن کر گشت پر مامور پولیس اہلکار موقع پر پہنچے تو ملزمان نے اندھا دھند فائرنگ کر دی اور فرار ہونے لگے۔ پولیس کی جوابی فائرنگ سے ایک ملزم گولی لگنے سے زخمی ہوگیا اور ملزمان کی موٹر سائیکل گر گئی۔ پولیس نے ملزمان کو گرفتار کرکے ان سے 2 پستول اور ایک خنجر ضبط کرلیا۔ پولیس زخمی ملزم کو قریبی اسپتال پہنچا رہی تھی کہ خون زیادہ بہہ جانے سے وہ راستے میں ہلاک ہوگیا۔ ایس ایچ او عدیل احمد نے ’’امت‘‘ کو بتایا کہ ہلاک ملزم کی شناخت 26سالہ ارمان کے نام سے ہوئی ،جبکہ اسامہ گرفتار ہے۔ ان کا کہنا تھا ملزمان اتحاد ٹاؤن کے رہائشی ہیں اور ان سے چھینی ہوئی ایک موٹر سائیکل بھی ملی ہے۔ پولیس نے کارروائی کے بعد ملزم کے لاش ورثا کے حوالے کرتے ہوئے گرفتار ملزم سے تفتیش شروع کر دی ہے۔