لیگی کارکنوں کی بڑی تعدادپمزپہنچ گئی-شدید نعرے بازی

اسلام آباد(نمائندہ امت) سابق وزیر اعظم میاں نواز شریف کو پمز لائے جانے کے موقع پر مسلم لیگ ن کے کارکنان کی بڑی تعداد بھی پمز ہسپتال پہنچ گئی،کارکنوں نے اس موقع پر شدید نعرے بازی کی ۔اتوار کی شام نواز شریف کی ہسپتال منتقلی پر لیگی کارکنان کی بڑی تعداد پمز ہسپتال پہنچی اور ’نواز شریف آئی لو یو‘، ’ووٹ کو عزت دو‘ جیسے نعرے لگائے۔ بعض لیگی کارکنان ہاتھوں میں گلدستے بھی اٹھائے ہوئے تھے۔ تاہم پولیس اہلکاروں نے کارکنان کو پمز ہسپتال کے کارڈیک سینٹر کی جانب بڑھنے سے روک دیا جہاں نواز شریف کو داخل کیا گیا ہے۔ ایک موقع پر اس وقت شدید بدمزگی دیکھنے میں آئی، جب پمز کارڈیک سینٹر میں داخل ایک مریض کے بزرگ اٹینڈنٹ محمد زاہد نے لیگی کارکنان کے سامنے آ کر میاں نواز شریف اور شہباز شریف کے خلاف نعرے بازی شروع کر دی جس پر لیگی کارکنان اور بزرگ شہری کے درمیان ہاتھا پائی بھی ہوئی، تاہم پولیس اہلکاروں نے بزرگ شخص کو حراست میں لے لیا اور موبائل میں ڈال کر تھانے منتقل کر دیا۔