وائس ایڈمرل کلیم شوکت کی رشین فیڈریشن نیوی کے سربراہ سے ملاقات

کراچی(اسٹاف رپورٹر)وائس چیف آف نیول اسٹاف وائس ایڈمرل کلیم شوکت نے روس کے شہر سینٹ پیٹرز برگ میں واقع سنٹرل نیول میوزیم میں رشین فیڈریشن نیوی کے کمانڈراِن چیف ایڈمرل ولادیمیرایوانو ِچ کورولیوسے ملاقات کی۔ اس موقع پر پیشہ ورانہ اُمور، دوطرفہ بحری اشتراک اور بحرِ ہند کی سکیورٹی صورتحال پر تبادلہ خیال کیا گیا۔دونوں ممالک کی بحری افواج کے مابین دو طرفہ تعاون کے مختلف شعبوں پر بھی بات چیت کی گئی۔رشین فیڈریشن نیوی کے کمانڈراِن چیف نے خطے میں بحری امن و استحکام کے قیام میں پاک بحریہ کے کردار اور خدمات کو سراہا۔ملاقات کے بعد تقریب میں بحری شعبے میں باہمی تعاون کی مفاہمتی یاداشت پرد ستخط کئے گئے۔ دورے کے دوران وائس ایڈمرل کلیم شوکت نے نیول شپ یارڈ اور رشین نیوی کے فریگیٹ ایڈمرل ماکاروو کا دورہ کرنے کے ساتھ سا تھ ر شین فیڈریشن نیوی ڈے کے موقع پر منعقدہ پریڈ میں بھی شرکت کی۔قبل ازیں سینٹ پیٹرز برگ بندرگاہ دورے کے دوران پاک بحریہ کے جہاز اصلت کی طرف سے جہاز پر ایک ضیافت کا اہتما م کیا گیا جس میں غیر ملکی اور مقامی شخصیات نے شرکت کی۔