دبئی پلٹ خاندان کے گھر کا صفایا

کراچی(اسٹاف رپورٹر)گلشن اقبال میں دبئی پلٹ خاندان کے گھر کا صفایا کردیا گیا۔ نامعلوم ملزمان لاکھوں روپے نقد اور زیورات لے اڑے۔ متاثرہ خاندان کو واپسی پر واردات کا علم ہوا۔ تفصیلات کے مطابق عزیز آباد کے علاقے گلشن اقبال بلاک 13سی گلی نمبر 5 مکان نمبر A-30میں نامعلوم ملزمان عقب میں لگی گرل کاٹ کر داخل ہوئے۔ الماریوں میں رکھے 15سو درہم3 لاکھ روپے اور 15 تولے سونا لے کر فرار ہوگئے۔ ذرائع کا کہنا ہے کہ متاثرہ فیملی 3ماہ قبل دبئی گئی تھی اور گھر بند پڑا ہوا تھا۔ ہفتے کو دبئی سے واپسی پر گھر میں داخل ہوئی تو الماریوں سے نقدی و زیورات غائب تھے، جبکہ سامان باہر پڑا ہوا تھا۔ پولیس نے پہنچ کر واقعہ کی درخواست وصول کرتے ہوئے تفتیش شروع کر دی ہے۔