ہالینڈ اور آئرلینڈ ویمنز ہاکی ورلڈ کپ فائنل میں پہنچ گئے

لندن (امت نیوز) دفاعی چیمپئن ہالینڈ اور آئرلینڈ کی ٹیمیں فتوحات برقرار رکھتے ہوئے ویمنز ورلڈ کپ ہاکی ٹورنامنٹ فائنل میں پہنچ گئیں، سیمی فائنلز میں ہالینڈ نے آسٹریلیا اور آئرلینڈ نے سپین کو شکست فاش سے دوچار کیا تھا، دونوں سیمی فائنلز کا فیصلہ پنالٹیز پر ہوا تھا۔ لندن میں جاری میگا ایونٹ میں کھیلے گئے پہلے سیمی فائنل میں آئرلینڈ ویمن نے سپین ویمن کو پنالٹی شوٹ آئوٹ پر 3-2 گولز سے ہرا کر فائنل میں پہنچنے کا اعزاز حاصل کیا تھا، مقررہ وقت تک دونوں ٹیموں کے درمیان مقابلہ 1-1 گول سے برابر رہا تھا تاہم پنالٹیز پر آئرلینڈ نے سپین کو 3-2 گولز سے ہرا کر فائنل کیلئے کوالیفائی کیا، دوسرے سیمی فائنل میں عالمی چیمپئن ہالینڈ ویمن نے آسٹریلیا ویمن کو سنسنی خیز مقابلے کے بعد پنالٹی شوٹ آئوٹ پر 3-1 گولز سے ہرا کر فائنل میں جگہ بنائی۔