کمسن کرکٹرز نے قومی کھلاڑیوں کو حیران کردیا

اسلام آباد (امت نیوز)کرکٹ کی بیش بہا صلاحیتوں سے لیس ایک 10سالہ پاکستانی بچے کی ویڈیو سوشل میڈیا پر پوسٹ کی گئی ہے جس نے قومی ٹیم کے سابق اور موجود کھلاڑیوں کی توجہ بھی حاصل کرلی۔میڈیا رپورٹ کے مطابق ویڈیو سوشل میڈیا پر کافی مقبول ہورہی ہے جس میں ننھے اسٹار کو بیٹنگ کرتے ہوئے دیکھا گیا ٗ اپنی عمدہ تکنیک اور بہترین دفاع کی حامل بیٹنگ سے اس بچے نے سب کے دل جیت لیے۔جنوبی پنجاب کے شہر رینالہ سے تعلق رکھنے والے بچے نے یکساں مہارت کے ساتھ تمام اسٹروک کھیلے جس پر قومی ٹیم کے اسٹارز بھی اسے داد دیے بغیر نہ رہ سکے۔قومی ٹیم کے مایہ ناز وکٹ کیپر بلے باز کامران اکمل نے کہا کہ یہ بچہ اصل ٹیلنٹ ہے، نیشنل کرکٹ اکیڈمی کو اس بچے کو ہر حال میں دیکھنا چاہیے، یہ مستقبل میں ایک ورلڈ کلاس بلے باز اور پاکستان کا اثاثہ بن سکتا ہے۔